Maqtaaraldaǵy turǵyndarǵa 96 tonna azyq-túlik taratyldy
«Nut Otan» partııasy oblystyq fılıaly tóraǵasynyń birinshi orynbasary, tótenshe jaǵdaılar boıynsha gýmanıtarlyq kómekterdi úılestirýshi Beısen Tájibaevtyń aıtýynsha, tasqyn sýdan zardap shekken azamatarǵa kómek elimizdiń barlyq oblystarynan jetkizilýde.
Atap aıtqanda Nur-Sultan, Almaty, Shymkent qalalarynan, Jambyl, Qyzylorda, Pavlodar oblystarynan túrli qoǵamdyq uıymdar men qaıyrymdylyq qorlarynan jáne jekelegen kásipkerlerden gýmanıtarlyq kómekter jetkizilýde. Onyń ishinde azyq-túlik, jeke bas gıgıenasyna arnalǵan zattar jáne kıim-keshekter de bar.
«Qazirgi tańda aýyldaryn sý basqan turǵyndardy ýaqytsha ornalastyrý úshin Maqtaaral jáne Jetisaı aýdandarynda 10 evakýtsııalyq beket jumys istep tur. Munda 3700-den astam adam ornalasqan. Qoımaǵa jınalǵan taýarlar suranysqa baılanysty sol pýnktterdegi jáne týystarynyń úıin panalap jatqan azamattarǵa júıelengen tártipte taratylýda», – deıdi Beısen Tájibaev.
Gýmanıtarlyq kómektiń kóptep kelýine baılanysty bir qoıma taýarǵa tolǵan. Qazirgi tańda ekinshi qoıma belgilenip, azyq-túlikter sonda jınaqtalýda. Qoımaǵa jaýapty , oblystyq ardagerler keńesi tóraǵasynyń birinshi orynbasary Kenjehan Tólebaevtyń aıtýynsha, qazirgi jınalǵan gýmanıtarlyq kómekter aldaǵy eki-úsh aıǵa jetýi tıis. Pýnktterden bólek, jekelegen týystarynyń úıinde jatqan turǵyndar úshin Atakent kentinde eki taratý oryndary jumys isteýde. Olar N9 mektep pen Komarova mektebinde ornalasqan. Sý basqan 5 aýyl turǵyndary osy jerge baryp, úılerine azyq-túlik alýyna jaǵdaı jasalǵan.
«Shtab qoımasynda búginde azyq-túlik qory jetkilikti. Endigi kezekkte ashanaǵa qajetti ydys-aıaq, úı jıhazdary, teledıdar men tońazytqyshtar, gaz plıtasy sekildi turmystyq zattarǵa qajettilik týyndaýy múmkin. Qaıyrymdylyq jasaýshy azamattar men kompanııalar osy jaǵyn eskerip, basymdyq berse degen usynys bar. Joǵaryda atalǵan zattar jańadan salynyp, paıdalanýǵa beriletin úılerge aýadaı qajet bolary sózsiz. Sol kezde árbir úıge bólinip beriledi»,- dedi Beısen Tájibaev.