Maqtaaraldaǵy sý shaıǵan aýyldardyń barlyǵynda ınfraqurylym tolyq jańartylýda

MAQTAARAL. QazAqparat – Túrkistan oblysynyń ákimi Ómirzaq Shókeev búgin Maqtaaral aýdanyndaǵy sý basqan aýyldarǵa arnaıy kelip, jergilikti turǵyndarmen kezdesti, dep habarlaıdy QazAqparat tilshisi.

Aımaq basshysy halyq qalaýlylary men qoǵamdyq keńes múshelerimen birge sý tasqynynan zardap shekken turǵyndardyń búgingi jaǵdaıymen tanysty.

Ómirzaq Shókeev Jańajol aýyldyq okrýgine qarasty Órgebas jáne Fırdoýsı aýyldaryn qalpyna keltirý jumysynyń barysymen tanysyp, eldimekenderdi aralap kórdi. Kezdesý barysynda oblys ákimi jaýaptylarǵa apattan japa shekken turǵyndardyń ótemaqysyn tezdetip tóleýdi, aýyldardy qalypqa keltirý jumysyn jedeldetýdi tapsyrdy.

Aıta keteıik, qalǵan aýyldarda qıraǵan úılerdi buzý men qurylys materıaldaryn tasymaldaýǵa Ózbekstan eliniń tótenshe jaǵdaı mınıstrligi tarapynan da kómek kúshi jumyldyrylǵan.

Máselen, Órgebas aýylyndaǵy 197 úıdiń barlyǵy jańadan salynady dep josparlanyp otyr. Aýyl turǵyndarynyń 90 paıyzyna qurylys qarajatynyń jartysy berilgen. Nátıjesinde 20-ǵa jýyq úıdiń irgetasy qalanyp, qabyrǵasy kóterilgen.

Al, Fırdaýsı aýylynda 320 turǵyn úı ıeleriniń jartysynan astamy qarajatyn qolyna alǵan. Aýylda apattan zardap shekken baspanalar buzylyp, jańa úılerdiń qurylysy bastalyp ketken.

Jalpy, sý shaıǵan aýyldardyń barlyǵynda ınfraqurylym tolyǵymen jańartylýda.