Maqtaaraldaǵy beton zaýyty aıyna 25-30 mln teńgeniń ónimin óndiredi

MAQTAARAL. QazAqparat – Túrkistan oblysy Maqtaaral aýdanynda aıyna 25-30 mıllıon teńgeniń daıyn ónimin shyǵaratyn beton zaýyty jumys isteýde. Óndiris orny aǵyn sý júıelerin salý men olarǵa qajetti quraldar jasap, gaz jelilerine jáne túrli mekemeler men jeke tulǵalardyń tapsyrysy boıynsha temir-betondar shyǵarýda, dep habarlaıdy QazAqparat tilshisi.

Sholpan Dúısenbına basshylyq etetin «Ǵıbrat Qurylys» JShS jobalyq quny 115 mıllıon teńgeniń tapsyrysyn qabyldaǵan. Búginde zaýyttaǵy alyp qondyrǵy saǵatyna 60 tekshe daıyn beton shyǵarýǵa qaýqarly.

«Sol qondyrǵynyń arqasynda 4 túrli ónim jasaı alamyz. Ózimizge qajetti shıkizattyń barlyǵyn Shymkentten aldyramyz. Sebebi, jetkizýshilerimizben talaı jyldan beri jumys istep kele jatqandyqtan, olar bizge tek sapaly ónim jiberedi», - deıdi kásiporynnyń ınjener-tehnology Ábdirahman Qarabekov.

57 azamatty turaqty jumyspen qamtyp otyrǵan kásiporynda ortasha jalaqy - 130 myń teńge. Jumysshylar ystyq tamaqpen, jatyn orynmen tolyq qamtylǵan. Aı saıyn orta eseppen 25-30 mıllıon teńgeniń ónimin shyǵaratyn kásiporyn basshylyǵy suranys pen usynysqa qaraı ónim kólemin arttyrýǵa qaýqarly.

Munan bólek, aýdanda qondyrǵylardyń barlyq fýnktsııasy bir tetikten basqarylatyn «Soldatos» asfalt-beton zaýyty ashylǵan. Maqtaaral aýdanynyń ındýstrıaldy aımaǵynda ornalasqan kásiporyn Grekııa memleketi ınvestıtsııasynyń arqasynda iske qosylǵan. Óndiris orny táýligine 1000 tonna asfalt-beton ónimderin shyǵara alady. Jobalyq quny 300 mıllıon teńgeni quraıtyn zaýytta 30 adam turaqty  jumyspen qamtylyp otyr.