Maqtaaralda zardap shekken birde-bir turǵyn kómekten tys qalmaıdy - Sáken Qalqamanov
Oblys ákimi orynbasarynyń aıtýynsha, aǵyn sýdan kelgen shyǵyn túgel esepteledi. Sodan keıin ǵana Úkimet pen oblystyq rezervten qarjy bólinip, turǵyndarǵa tólenedi. Al, tótenshe jaǵdaıdy paıdalanyp, jalǵan aqparat taratýshylar men alaıaqtyq jasaǵandardyń isimen polıtsııa aınalysady.
«Qazirgi tańda kóptegen azamattar ózderine jalǵan tanymaldylyq jasap alǵysy keledi. Ondaı azamattardyń maqsaty da belgili. Biz mundaı málimetterdi polıtsııaǵa joldap jatyrmyz. Máselen, bizge jańa ǵana maqtaaraldyqtarǵa kómek kórsetý úshin bir azamattyń kaspı goldpen esepshot ashqany týraly habar kelip tústi. Biz bul málimetti polıtsııa men prokýratýraǵa joldadyq. Tergeý júrgiziletin bolady. Tótenshe jaǵdaı kezinde jalǵan aqparat taratqan kez-kelgen azamat ákimshilik jáne basqa da jazalarǵa tartylatyn bolady», - dedi Sáken Qalqamanov.
Nur Otan partııasy oblystyq fılıaly tóraǵasynyń orynbasary Beısenbaı Tájibaev zardap shegýshilerge kórsetilip jatqan kómek barysyn aıtyp ótti. Ol aýdanda ashylǵan 22 evakýatsııalyq pýnkte turǵyndardyń ystyq tamaqpen jáne qajetti jaǵdaımen qamtamasyz etilip otyrǵanyn jetkizdi. Jańadan ashylǵan kómek qory týraly túsindirip ketti.
«Búginde maqtaraldyqtarǵa kómek kórsetý úshin arnaıy qor ashylǵan. Ondaǵy qarajattardyń durys jumsalýy arnaıy Ardagerler keńesiniń músheleri, aýyldardyń belsendileri qosymsha baqylaıtyn bolady. Sondaı-aq, zattaı nemese kıim-keshekpen kómektesemin deýshiler úshin Asyqata kentinde arnaıy qoıma ashylǵan. Onda Nur Otan partııasynyń jergilikti belsendileri men aqsaqaldar qaýymy, janashyr azamattar qoǵamdyq negizde qyzmet atqaratyn bolady. Olar barlyq bólingen zattardy qoǵamdyq negizde qadaǵalaý júrgizedi. Barlyq jumys ashyq uıymdastyrylady»,- deıdi Beısenbaı Tájibaev.