Maqtaaralda túrli etnostyń jastary án aıtyp jarysty
16:25, 16 Qarasha 2019
MAQTAARAL. QazAqparat – Túrkistan oblysy Maqtaaral aýdanynda túrli etnostyń jastary án baıqaýyna qatysty. Agrobıznes kolledjinde bilim alatyn jastar «Meniń elim – Qazaqstan» atty mádenı sharada óz ónerin kórsetti, dep habarlaıdy QazAqparat tilshisi.
Oblys ákimi apparatynyń «Qoǵamdyq kelisim» KMM uıymdastyrǵan baıqaýǵa 11 úmitker qatysyp, baq synady. Óner saıysynyń erejesi boıynsha qatysýshylardyń ultyna jáne jasyna shekteý qoıylmaǵan. Olardan tek bir án oryndaý talap etildi.
Búgingi án báıgesine qyzý daıyndyqpen kelgen úmitkerler ózderiniń otansúıgishtik sezimderin shyrqaǵan ánderi arqyly dáleldep jatty.
Memlekettik tilde jáne otanshyldyq rýhta án oryndaýdy talap etken baıqaýda qazylar alqasy ánniń yrǵaǵy men daýys dıapazonyna erekshe mán berdi. Olar ótinim bildirgen 11 úmitkerdiń ánin tyńdap, «júzden júırik, myńnan tulpar» atanǵandardy anyqtady.
Baıqaý qorytyndysy boıynsha jeńimpaz atanǵan jastarǵa qarjylaı syılyqtar men dıplomdar tabys etildi.