Maqtaaralda Naýryz merekesine qatysýshylar kólik súırep, qoshqar kóterdi
«Maqtaaral» orkestriniń súıemeldeýimen aýdandyq mádenıet úıiniń ónerpazdary án-jyrdan shashý shashsa, mektep oqýshylarynan quralǵan bı ujymdary saltanatty keshtiń sánin keltirdi. Sondaı-aq, jergilikti turǵyndar men qonaqtar arasynda alyptar saıysy ótti.
Bilekti jigitter salmaǵy 160 keli bolatyn zil temirdi 20 metr jerge kóterip alyp barý, 200 kelilik júk kóliginiń dońǵalaǵyn 20 metr jerge aýdaryp jetkizý, 1500 kelilik jeńil kólikti 20 metr jerge súıreý, 32 kelilik kir tasyn 20 metr jerge kóterip barý sekildi saıystardan baq synady.
Atalǵan sharttardyń barlyǵyn 1 mınýt 29 sekýndta oryndaǵan Eraj Kenjaev esimdi balýan jeńimpaz atandy.
Al, qoshqar kóterý saıysynan salmaǵy 30 keli keletin qoshqardy 5 mınýt ishinde 116 ret kótergen Eldos Zýlpan bas júldeni jeńip aldy. Munan bólek merekege kelýshiler kir tasyn kóterý, qol kúres, asyq atý, toǵyzqumalaq oıyndarynan saıysqa tústi. Sondaı-aq, jasóspirimder arasynda qazaq kúresinen aýdan birinshiligi uıymdastyryldy. Oǵan jalpy 60-tan astam balýan qatysyp, ózara baq synady.
Saltanatty sharada aýdan ákimi Baqyt Asanov, aýdan ákiminiń orynbasary Altyn Eshanqulova jáne ardagerler sózge shyǵyp, kópshilikti kóktemniń jaıma shýaq merekesimen quttyqtady.
Sonymen qatar, eldiń birligin arttyryp, yntymaǵyna uıytqy bolyp júrgen aýdannyń belsendi azamattaryn alǵys hatpen marapattady.
Naýryz merekesi «Maqtaaral» mádenıet úıi ónerpazdarynyń qatysýymen ótken kontserttik baǵdarlamamen jalǵasyn tapty.