Maqtaaralda memlekettik qyzmet sapasyn kóterýge arnalǵan jıyn ótti

MAQTAARAL. QazAqparat – Túrkistan oblysy Maqtaaral aýdanynda memlekettik qyzmet sapasyn arttyrýǵa arnalǵan jıyn ótti. Maqtaaral aýdandyq «Jastar resýrstyq ortalyǵy» men «Uly dala aýyldary» qoǵamdyq birlestiginiń uıymdastyrýymen ótken basqosýda memlekettik qyzmetkerlerdiń el ishinde mártebesin kóterý men olardyń oń ımıdjin qalyptastyrý máseleleri talqylandy, dep habarlaıdy QazAqparat tilshisi.

«Jańa jol» jalpy orta mektebinde ótken jıynǵa aýdandaǵy barlyq aýyldyq okrýgterden jas mamandar men okrýg ákimderiniń orynbasarlary, aýyl jastary qatysty.

Basqosýda jastar arasynda memlekettik qyzmetke degen qyzyǵýshylyqty arttyrý jaıy qamtyldy. Búgingi memlekettik qyzmet jónindegi jańa baǵdarlamalar men olardyń jaýapkershilikteri, sonymen qatar, memlekettik qyzmetkerlerdiń quqyqtaryn qorǵaý men jalaqylaryn kóbeıtý, salalar boıynsha básekelestikti arttyrý máseleleri sóz boldy.

«Eldiń erteńgi kúngi tizginin ustaıtyn azamattary biz bolǵandyqtan, el jastary ózine júktelgen árbir iske, senimge úlken jaýapkershilikpen qaraýymyz kerek. Búginde memleket bizdiń sapaly bilim alýymyzǵa, adal eńbek etip, jarqyn bolashaǵymyzdy óz qolymyzben jasaýymyzǵa barlyq múmkindikterdi jasap otyr. Sondyqtan, biz múmkindikterimizdi barynsha tıimdi, durys paıdalana alýymyz kerek»,- dedi jıyn barysynda Maqtaaral aýdandyq «Jastar resýrstyq ortalyǵy» KMM basshysy Súndet Kenjebaev.

Basqosý sońynda jıynǵa qatysýshylar tarapynan memlekettik qyzmet sapasyn jaqsartýǵa baılanysty suraqtar qoıylyp, usynys-pikirler tyńdaldy.