Maqtaaralda «Qamqorlyq» baǵdarlamasy aıasynda bir otbasy baspanaly boldy
Atakent kentiniń turǵyny ári eki balanyń anasy, múmkindigi shekteýli anasynyń qaraýshysy Baǵnur Altynbekova osylaısha qýanyshqa keneldi, dep habarlaıdy QazAqparat tilshisi.
Turǵyn úıdiń kilti Maqtaaral aýdandyq «Qazaqstan ardagerleri» qoǵamdyq uıymynyń «Maqtaaral baspana» qoǵamdyq qory demeýshiligimen tapsyryldy. Osy kúnge deıin baspana taýqymetin tartyp kelgen otbasy jany jomart jandarǵa alǵysyn bildirdi.
Aıta keteıik, búginde óńirde oblys ákimi Ómirzaq Shókeevtyń tapsyrmasymen jáne «Nur Otan» partııasy Túrkistan oblystyq fılıalynyń úılestirýimen júzege asyp jatqan «Qamqorlyq» baǵdarlamasyna turǵyndar dán rıza. Máselen, Maqtaaral aýdany boıynsha 115 otbasy tizimge alynǵan jáne olarǵa kómek kórsetilip jatyr. Baǵdarlama aıasynda áleýmettik az qamtylǵan otbasylarǵa qoldaý kórsetý is-sharalary áli de jalǵasyn tabatyn bolady.