Maqtaaralda Bilim bólimi 2,4 mlrd teńgeden astam qarjyny jymqyrǵan

<p>ASTANA. KAZINFORM — Jymqyrý bilim salasynda jumys istemeıtin tulǵalardyń esep shottaryna zańsyz jalaqy aýdarý arqyly jasalǵan.</p>

Túrkistan oblysynyń prokýratýrasy málim etkendeı, Bilim salasyndaǵy bıýdjet qarjysyn jymqyrýmen baılanysty qylmystyq is aıasynda memleketke 1 mlrd teńgege jýyq zalal qaıtaryldy.

Túrkistan oblysynyń prokýratýrasy Maqtaaral aýdany Bilim bóliminiń 43 laýazymdy tulǵalary men jaýapty qyzmetkerlerine qatysty bıýdjet qarjysyn (2,4 mlrd teńgeden astam) jymqyrý faktisi týraly isti sotqa joldady.

— Jymqyrý bilim salasynda jumys istemeıtin tulǵalardyń esep shottaryna zańsyz jalaqy aýdarý arqyly jasalǵan. Búgingi kúni kúdiktiler 333,5 mln teńge kóleminde memleketke keltirilgen zalaldy qaıtardy, sondaı-aq olardyń qylmystyq jolmen tabylǵan 649,7 mln teńgeni quraıtyn múlikterine tyıym salyndy, — delingen habarlamada.

Buǵan deıin habarlaǵanymyzdaı, memlekettik múlikti talan-tarajǵa salǵan shymkenttik sheneýnik 8 jylǵa sottaldy.