Maqtaaralda 100 myń teńge ótemaqy berile bastady

NUR-SULTAN. QazAqparat - Maqtaaral aýdanynda topan sýdan zardap shekken 6128 turǵynǵa úkimet rezervi esebinen 100 myń teńge ótemaqy tóleý úshin «Halyq» bank kartalary taratyla bastady, dep habarlaıdy Ortalyq kommýnıkatsııalar qyzmetiniń Túrkistan oblystyq fılıaly.

Osy maqsatta qazirgi tańda Myrzakenttegi «Gúlsara» toıhanasy men «Nurbóbek» balabaqshasynda jáne A. Pýshkın atyndaǵy jalpy orta mektebinde sondaı-aq, Atakent kentindegi jáne taǵy da basqa evakýatsııalyq pýnktterde mamandar karta úlestirý jumystaryn bastap ketti.

Á. Ýsmanovtyń qorynan 5202 otbasyǵa bólinetin 1000 AQSh dollarlyq ótemaqy da osy kartalarǵa aýdarylatyn bolady. Búgin bul týraly Túrkistan oblysy qarjy jáne memlekettik aktıvter basqarmasynyń basshysy Abdrahman Tasybaev málim etti.

Basqarma basshysynyń aıtýynsha, úkimet rezervinen beriletin 100 myń teńge ótemaqy sý tasqynynyn zardap shekken 5 eldi mekende ıaǵnı, Jeńis, Jańaturmys, Ferdaýsı, Dostyq, Órgebas aýylynda turatyn 846 otbasyndaǵy 6128 turǵynǵa beriletin bolady. Al, Á. Ýsmanovtyń qorynan 1000 AQSh dollaryn sý basqan Jeńis, Jańaturmys, Ferdaýsı, Dostyq, Órgebas aýyldarynan bólek, evakýatsııalanǵan Myrzakent, Aqjol, T. Jaılybaev, Jantaqsaı, Araıly, Nurlytań, Nurlyjol, Shuǵyla eldi mekenderiniń 5202 otbasyna úlestirilmek.

Aıta keteıik, Maqtaaral aýdanyndaǵy bank kartasyn taratý oryndarynda koronavırýs indetine baılanysty qabyldanǵan saqtyq sharalarynyń barlyq talaptary qatań túrde saqtalý kózdelgen.