Maqtaaralda 1,8 myń gektar jer maqsatyna saı paıdalanylmaǵany anyqtaldy - OQO

ASTANA. QazAqparat - Maqtaaral aýdanynda jer reformasyn jergilikti turǵyndarǵa túsindirý, aýyl sharýashylyq jáne kásipkerlik úshin qoldanylyp jatqan jerlerdi tıimdi paıdalaný maqsatynda arnaıy semınar-keńes ótti, dep habarlaıdy oblys ákiminiń baspasóz qyzmeti.

Jıynǵa Ońtústik Qazaqstan oblysy ákiminiń orynbasary Erbol Sadyr, Maqtaaral aýdanynyń ákimi Ǵ.Ismaılov, oblystyq jer qatynastary basqarmasynyń basshysy Sozaqbaı Ábdiqulov jáne aýyl ákimderi, bólim basshylary qatysty. Sharanyń negizgi maqsaty - jer máselesine qatysty salada atqarylyp jatqan jumystardy taldaý.

Oblystaǵy jer qatynastary salasyndaǵy jumystardy iske asyrýǵa jáne jer resýrtaryn tıimdi basqarýǵa baǵyttalǵan jer reformasyn túsindirý boıynsha oblystyq jer qatynastary basqarma basshysynyń orynbasary E.Tilegen baıandama jasady. Onyń aıtýynsha, Maqtaaral aýdanynyń jer qory 185,4 myń gektardy quraıdy. Al, aýyl sharýashylyǵy maqsatyndaǵy jerler 145,7 myń gektarǵa jetse, onyń ishinde egistik jer 140,1 myń, (barlyǵy sýarmaly jerler), tyńaıǵan jer 1,8 myń, jaılymdyq jerler 3 myń, kóp jyldyq ekpeler 0,8 myń gektarǵa para-par.

«2016 jyly aýyl sharýashylyǵy maqsatyndaǵy jerlerge júrgizilgen túgendeý jumystarynyń nátıjesinde jalpy aýdan boıynsha 392 agroqurylymdardyń ıeligindegi 1 807 gektar jer nysanaly maqsatyna saı paıdalanylmaı jatqandyǵy anyqtalyp, shara kórý úshin oblystyq jer ınspektsııasy basqarmasyna qujattar joldanǵan. Aýdan ákimdigi tarapynan búgingi kúnge paıdalanylmaı jatqan 103 gektar jer memleket menshigine qaıtarylǵan. Al, 1065,6 gektar jeri oblystyq jer ınspektsııasynyń qaraýyna berilgen. Al, qalǵan 638,4 gektar jerdiń máselesi naqtylanbaǵan», - dedi E.Tilegen.

Budan bólek, basqarma basshysynyń orynbasary buǵan deıin aýdanda kásipkerlik maqsattaǵy 38 jer paıdalanýshynyń 23,7 gektary paıdalanylmaı jatqanyn atap ótti. QR-nyń jer kodeksin buza otyryp paıdalanyp jatqan 13 jer ýchaskesine 861 myń teńge aıyppul salynyp, jer zańnamasyn buzý týraly nusqaýlyq berilgen. Odan basqa 2016 jyly kásipkerlik maqsatqa berilip, paıdalanbaı jatqan 38 jer ýchaskesi anyqtalyp, olarǵa da shara kórilgen.

Jalpy, jıynda jer mamandary kóptegen suraqtarǵa jaýaptar alyp, jer máselesine qatysty jumystardy budan da joǵary deńgeıde jandandyrý kerektigi aıtyldy. Ásirese, memlekettiń altyn qory sanalatyn sýarmaly jerdiń 30 paıyzy Maqtaaralda ekendigi jáne bos jatqan sýarmaly jerlerdiń máselesin tez arada sheshý kerektigine erekshe nazar aýdaryldy. Oblys ákiminiń orynbasary E.Sadyr halqy óte tyǵyz ornalasqan Maqtaral aýdanynda bir qarys jer bos jatpaý kerektigin eskertti.