Maqtaaral aýdanynyń ortalyǵynan bir túnde 12 myńǵa jýyq adam kóshirilgen
Oblys ákimdiginiń málimetinshe, halyqtyń kóshýin qamtamasyz etý maqsatynda 68 avtobýs bólingen. Atakenttegi oqshaýlaý oryndaryna jetkizilgen turǵyndarǵa qajetti kómek kórsetilýde. Eń aldymen oqshaýlaý oryndaryna barǵan turǵyndar esik aldyndaǵy medıtsına mamandarynyń arnaıy blokpostyna birtindep tirkelip, koronavırýs indetin anyqtaý qurylǵysymen dene temperatýrasy tekseristen ótkizilgen. Sodan keıin ǵana oqshaýlaý oryndaryna jiberilgen.
Aıta keteıik, keshe túske deıin Maqtaaral aýdanynda oryn alǵan jaǵdaıǵa baılanysty 2243 azamat qaýipsiz aımaqqa kóshirilse, tústen keıin sý basý qaýpi basym bolǵan Nurly jol men Fredaýsı aýyldarynan 415 úıdiń 3200-den astam turǵyny qaýipsiz aımaqqa shyǵaryldy. Al, túngi saǵat 23:00-de Myrzakent kentiniń turǵyndaryn kóshirý jumystary bastalyp ketti. Sebebi, sarqyndy sý Myrzakent kentiniń irgesine jaqyndap qalǵan bolatyn.
«Arnaıy shtab kelisimimen halyqty kóshirý týraly sheshim qabyldandy. Tótenshe jaǵdaıǵa baılanysty aýdanda 18 evakýatsııalyq oryndar naqtylanyp, olar Atakent, Maqtaral, Jambyl eldimekenderinde ázirlendi. Apattan qutqarý jumystaryna 630 adam men 2 sý kóligi jáne 56 tehnıka jumyldyryldy. Qazirgi tańda qaýipti aımaqtaǵy azamattar men úı janýarlaryn qaýipsiz jerge kóshirý sharalary uıymdastyrylýda. Bul jumystarǵa Keles, Jetisaı, Shardara, Saryaǵash aýdandarynyń ákimdikteri atsalysyp jatyr. Desek te, aýdanda sý basyp qalý qaýpi bar aýyldar da áli de az emes. Solardyń biri - Jańa aýyl aýyldyq okrýgine qarasty Ferdoýsı eldimekeni. Qazirgi tańda aýyl ortasyndaǵy «Ferdoýsı» jalpy orta mektebiniń aýmaǵyna sý kóterilgen» delingen habarlamada.
Budan bólek, zerdeleý, zertteý jumystarynyń nátıjesinde sý tasqyny kezinde Jańa jol men Eńbekshi aýyldyq okrýgterindegi 3 eldimekende 1682 gektar aýyl sharýashylyǵy daqyldary zardap shekeni anyqtalyp otyr. Aldyn ala boljam boıynsha 181,1 mln teńgeniń shyǵyny eseptelgen.
Atap aıtqanda, 1480 gektar maqta - 148 mln teńgege, 42 gektar jońyshqa - 2,1 mln, 150 gektar baqsha - 30 mln, 10 gektar júgeri - 1 mln teńgelik shyǵynǵa usharady dep boljanýda. Sondaı-aq, atalǵan 4 eldimekende 5335 mal basy tirkelip, onyń ishinde 799 mal basy zardap shegip, 249 mln shyǵynǵa usharaǵan. Onyń 328-i - iri qara, 361-i - usaq mal, 53-i - jylqy, 57-si - túıe. Maqtaaraldan - 46, Jetisaıdan - 10, Shardaradan - 5, barlyǵy 61 veterınar dáriger Jantaqsaı, Ferdoýsı eldi mekenderindegi 3686 maldy evakýatsııalaý jumystaryn tolyq aıaqtady.
Degenmen sý basyp qalǵan aımaqtarda qansha maldyń sýǵa ketkenin naqty anyqtaý ázirge múmkin bolmaı otyr. Óıtkeni sý basqan aımaqqa kirý múmkin emes.
Mamandardyń aıtýynsha, buzylǵan dambadan kelip jatqan qashyrtpa sýdyń kólemi azaımaýda. Sol sebepti tótenshe jaǵdaı salasynyń mamandary sý basqan aýyldardaǵy sý deńgeıiniń naqty qandaı deńgeıge kóterilgenine kóz jetkizý úshin tıisti zerdeleý jumystaryn júrgizýge kirisken.
Esterińizge sala keteıik, 1 mamyrda Sardoba sý qoımasy bógetin sý shaıyp ketýine baılanysty Ózbekstannyń Syrdarııa oblysyndaǵy eldimekendi sý basty.
Sonyń saldarynan Maqtaaral aýdanynda shekara mańyndaǵy birneshe kollektor sýǵa tolyp qalǵan. Keshe Maqtaaraldaǵy ortalyq kollektordan sý syrtqa jaıylyp, Jeńis, Jańa turmys aýyldaryn sý alyp ketti. Oblystyq mańyzy bar «Myrzakent - Jeńis - Jańa turmys» avtomobıl jolyn sý basyp, kólik júre almaýda. Tórt aýyldan 5400 adam qaýipsiz jerge kóshirilgen.
Sondaı-aq Túrkistan oblysynda sý tasqyny qaýpi tóngen 3 aýyldyń halqy evakýatsııalanyp jatyr. Oblys ákimi Ómirzaq Shókeev halyqty sabyrǵa shaqyryp, tótenshe jaǵdaıdy retteýge aımaqtyń tolyq múmkindigi bar ekenin aıtty.