Maqtaaral aýdanynda «Rýhanı jańǵyrý: Túrkistan dáristeri» kezdesýi ótti
Oblystyq qoǵamdyq damý basqarmasynyń uıymdastyrýymen ótken basqosýda «Rýhanı jańǵyrý» baǵdarlamasynyń mańyzdylyǵy túsindirilip, osy baǵytta atqarylyp jatqan jumystardyń barysy aıtyldy, dep habarlaıdy QazAqparat tilshisi.
Alqaly jıynǵa oblystyq qoǵamdyq damý basqarmasynyń jastarmen jumys bóliminiń basshysy Seıdýlla Ismaılov pen Shymkent qalasyndaǵy N.Nazarbaev mektebiniń «Rýhanı jańǵyrý» bóliminiń basshysy Mádı Beısenov, aýdannyń «Jastar resýrstyq ortalyǵy» KMM-nyń dırektory Súndet Kenjebaev pen aýdannyń ardagerleri, ákeler mektebiniń tóraǵalary men erikti jastar qatysty.
Basqosýda sóz alǵandar atalǵan baǵdarlamanyń birneshe baǵyttary boıynsha baıandama jasap, jergilikti halyqtyń saýaldaryna jaýap berdi.
Aıta keteıik, aǵymdaǵy jyly Elbasy N.Á.Nazarbaevtyń «Rýhanı jańǵyrý: bolashaqqa baǵdar» baǵdarlamalyq maqalasynyń jaryq kórgenine 3 jyl toldy. Maqala jarııalanǵan kúnnen bastap oblystyq, aýdandyq deńgeıde mańyzdy sharalardyń jospary ázirlenip, olar joǵary deńgeıde uıymdastyryldy. Oǵan dálel - Túrkistan oblysynyń maqaladaǵy maqsattardyń oryndalýy boıynsha Respýblıkada aldyńǵy orynǵa shyǵýy. Baǵdarlamanyń josparyna sáıkes «Túrkistan tórinde» jobasy, «Jas Turkistan – 2019» marafony, «Uly Dalanyń Túrkistany» foto ekspedıtsııasy, «Tarıhy tereń Túrkistan» aqparattyq týrlary, «Altyn uıam» jobalary respýblıkalyq deńgeıde uıymdastyryldy. Sondaı-aq, baǵdarlama aıasynda tarıhı kınolar, anımatsııalyq fılmder, óńirdegi aqyn-jazýshylardyń 10 tomdyǵy jáne tarıhı baǵyttaǵy birneshe týyndylar qalyń kópshilikke jol tartty.