Maqtaaral aýdanynda apat saldaryn joıýǵa jergilikti qoǵam belsendileri tartylǵan
Elimizdiń túkpir-túkpirinen gýmanıtarlyq kómek jetkizilip, turǵyndardyń úılerin salý men ótemaqylaryn tóleý baǵytynda da jumystar júrgizilýde. Aldymen topan sý shaıyp ótken eldimeken turǵyndarynyń qatysýymen jınalystar ótkizilýde. Turǵyndar óz aýyldastarynyń arasynan belsendi ókilderin saılady. Atap aıtqanda, Jańaturmys, Jeńis, Fırdoýsı, Órgebas, Dostyq aýyldarynan jalpy 25 belsendi saılanyp, óz jumystaryna kirisip ketken. Olar óz aýyldastarynyń aryzdary men ótinishterin, máselelerin memlekettik organdarǵa nemese arnaıy shtabqa jetkizedi. Tıisinshe memleket tarapynan beriletin kómekter, ótemaqy men baspanaǵa qujat jınaý, azyq-túlik úlestirý jáne ózge de jańalyqtar boıynsha túsindirme jumystaryn júrgizip jatyr.
Halyq pen bılik arasynda altyn kópir bolyp júrgen belsendi azamattardyń arasynda aýyl bıleri, túrli sala ókilderi bar. Jalpy topan sý saldaryn joıýǵa memlekettik organdarmen qatar túrli qaıyrymdylyq qorlary, volonterlar klýbtary, «Nur Otan» partııasy, jastar uıymdary belsene atlasysyp jatyr. Sonymen birge «Aýyl» partııasynan da gýmanıtarlyq kómek jetkizildi. Bul – elimizde azamattyq qoǵamnyń qalyptasqanynyń belgisin kórsetedi.
Eske salaıyq, topan sý saldarynan aldyn ala esep boıynsha 6 myńnan astam turǵyny bar 5 eldimekende 965 turǵyn úı sý astynda qalǵan. Myrzakent aýylynyń mańynan jańa shaǵynaýdanǵa jer bólinip, 505 turǵyn úıdiń qurylysy bastaldy. Aýdanda topan sýdy sorý, túrli qaldyqtardan tazartý jumystary jalǵasýda. 10 evakýatsııalyq ortalyqtarda 2715 turǵyn ornalastyrylǵan. Olarǵa turaqty túrde kómek kórsetilip jatyr. Sonymen birge týystary men jaqyndarynyń úıin panalap júrgen sý basqan aýyl turǵyndary da azyq-túlikpen, gýmanıtarlyq kómekpen qamtylǵan.