Maksım Spotkaı: Ulttyq keńestiń qurylýy - qoǵamnyń demokratııalanýyna serpin beredi
«Biz Qazaqstannyń damýynyń jańa tarıhı kezeńine qadam bastyq. 9 maýsymda ótken kezekten tys Prezıdent saılaýynda qazaqstandyqtardyń basym bóligi Qasym-Jomart Kemeluly Toqaevqa daýys berdi. Saılaý arqyly jastar, QHA jastary qazirgi tańda búkil álem qurmetteıtin táýelsiz elimizdiń qurylýyndaǵy Tuńǵysh Prezıdentimizdiń asa kórnekti rólin atap ótýde. Bul saılaýdyń nátıjesin Elbasyna kórsetilgen zor qurmet pen oń saıasatyna degen senim dep qabyldaýǵa tolyq negiz bar», - dedi Maksım Spotkaı QR Prezıdenti ulyqtaý rásiminde aıtylǵan bastamalardy talqylaýǵa arnalǵan QHA keńesiniń otyrysynda.
«Jańǵyrý joly» jastar qozǵalysynyń tóraǵasy óz sózinde jastar úshin Prezıdenttiń ulyqtaý rásimindegi sóziniń 10-shy baǵyty mańyzdy ekenin atap ótti.
«Prezıdent bıznes pen startaptardy qoldaýǵa, jastardy jumysqa ornalastyrýǵa nazar aýdaryp otyrǵanyn aıtty. Meniń oıymsha, bizdiń qozǵalystyń jobalyq baǵdaryna qaraı naqty baǵyttar boıynsha jańa jobalardy bastaıtyn bolamyz. Prezıdenttik kadrlyq rezerv jastar úshin maqsat emes, óz halqyna adal qyzmet etý múmkindigi retinde qarastyrylýy kerek degen oıdamyn. Prezıdenttik kadrlyq rezerv «Qazaqstannyń 100 jańa esimi» jobasymen salmaqty sınergııalyq áserin kórsetetinine senimdimin», - dedi ol.
Maksım Spotkaı sonymen qatar, «Jańǵyrý joly» qozǵalysynyń maqsaty - etnıkalyq ereksheligine qaramastan jastarǵa áleýetin pash etýge múmkindik berý ekenin atap ótti.
«Máselen, óńirlerge qaraıtyn bolsa, bizdiń kóptegen jergilikti bólimshelerimizdi ártúrli etnostyń jastary basqaryp otyr. Sondaı-aq, biz qazaq tilin úıretý klýbtarymen jumys istep jatyrmyz. Óńirlerde ondaı qajettilik bar. Soltústik, ShQO ondaı jobalar iske asyrylyp jatyr», - dedi Maksım Spotkaı.
Ol sózinde Ulttyq qoǵamdyq senim keńesiniń qurylýy - ishki saıası ahýaldyń jaqsarýyna, qoǵamnyń demokratııalanýyna jáne sabaqtastyqty, ádildikti, órleýdi ustanýǵa serpin beretinin jetkizdi.