Makron men Sı Tszınpın Olımpıada kezinde búkil soǵysty toqtatýǵa shaqyrdy

<p>ASTANA. KAZINFORM &ndash; QHR kóshbasshysy Sı Tszınpın Parıjde ótetin Olımpıada kezinde soǵysty jahandyq deńgeıde toqtatý úshin Frantsııamen jumys isteýge daıyn ekenin málimdedi, dep habarlaıdy <a href="https://ru.euronews.com/my-europe/2024/05/07/xi-in-france" target="_blank" rel="noopener">Euronews.</a>&nbsp;&nbsp;</p>

Parıjde ótken baspasóz máslıhatynda Sı Tszınpın Qytaı Ýkraınadaǵy beıbitshilikke qol jetkizýde belsendi ról atqaryp otyrǵanyn aıtty.

«Búgin álem tynysh emes. BUU Qaýipsizdik keńesiniń turaqty múshesi jáne jaýapty iri el retinde Qytaı Parıjdegi Olımpıada oıyndary kezinde jahandyq atysty jáne soǵysty toqtatý múmkindigin paıdalaný úshin Frantsııamen jumys isteýge daıyn», - dedi Sı Tszınpın.

Onyń sózderi Olımpıada kezinde bitimge shaqyrǵan Makronnyń uqsas málimdemelerimen úndestik tapty. 

Eki basshy arasyndaǵy kelissózde saýda máselesi sóz boldy. 

Buǵan deıin Makron Qytaıdyń protektsıonızm men sýbsıdııany kúsheıtý túrindegi saýda tájirıbesin aıyptaǵan.

Eýropa ekonomıkalyq egemendiginiń jaqtaýshysy Frantsııanyń konıak pen ózge eýropalyq brendılerge qatysty Qytaıdyń dempıng tergeýine, sondaı-aq frantsýz kosmetıkasy men basqa sektorlardaǵy shıeleniske qatysty alańdaýshylyǵyn bildirdi.

Qytaı Reseı-Ýkraına qaqtyǵysynda beıtarap ekenin málimdedi.