Makron halyqqa joldaýynda ne aıtty

<p>ASTANA. KAZINFORM &ndash; Frantsııa prezıdenti 5 jeltoqsanda respýblıkanyń 73 jastaǵy premer-mınıstri Mıshel Barneniń otstavkasyn qabyldaǵannan keıin efırge shyǵý týraly sheshim qabyldady.</p>

Frantsııa saıası daǵdarys jaǵdaıynda óz prezıdentiniń sózin kútti. 10 mınýttyq sózinde Emmanıýel Makron qazirgi jaǵdaıǵa óziniń kózqarasyn belgiledi. «Le Figaro» basylymy Frantsııa prezıdenti sóziniń kelesi negizgi aspektilerine toqtaldy. 

1. Emmanıýel Makron Ulttyq assambleıany jazda taratý týraly sheshimin «túsinbegenin» moıyndady. Alty aıdan keıin respýblıka prezıdenti «bul sózsiz» shara bolǵanymen, onyń sheshimi «túsinilmegenin» moıyndady.

«Bul meniń jaýapkershiligim», - dedi Makron. Zań shyǵarýshy organdarǵa jańa saılaýdy taǵaıyndaý týraly óz tańdaýyn aqtaý úshin ol sol kezde ekstremaldy kúshterdiń alda turǵanyn jáne osy kúzde senimsizdik votýmyn jarııalaǵanyn atap ótti. 

2. Prezıdent respýblıkaǵa qarsy maıdandaǵy ásireońshyldar men solshyldardyń «odaqtasýyn» aıyptady. Associated Press pikirinshe, frantsýz kóshbasshysynyń sóz sóıleýi birshama agressıvti bolyp, el bıliginiń kúıreýi úshin barlyq kináni «Ulttyq birlestiktegi» qarsylastary men ásiresolshyldarǵa júktegen. Ol ásireońshyldardy erekshe atap ótip, «olar tártipsizdikti tańdaǵanyn» málimdedi. 

3. Beısenbide sóılegen sózinde Emmanıýel Makron prezıdent retinde qalýǵa nıetti ekenine esh kúmán qaldyrǵan joq.

«Sizder maǵan bergen mandat 5 jylǵa eseptelgen, men ony sońyna deıin oryndaımyn», - dedi ol. Frantsýz kóshbasshysy respýblıka saıasatkerleriniń ony otstavkaǵa ketýge shaqyrǵan málimdemesine osylaısha jaýap berdi. 

4. Makron ózine senimsizdik votýmyna ushyratpaýǵa mindettenetin «barlyq saıası kúshterdi bildiretin ortaq múddeler úkimetin» qurý týraly habarlaıdy. Alaıda Frantsııa basshysy jańa premer-mınıstr laýazymyna kandıdatty áli ataǵan joq.

Sonymen qatar, prezdent Mıshel Barnege eńbegi men adaldyǵy úshin alǵys bildirdi. Ulttyq assambleıanyń áleýmettik qamsyzdandyrýdy qarjylandyrý týraly zań jobasyn qabyldamaýy sebebimen 2025 jylǵa arnalǵan bıýdjettiń bolashaǵy belgisiz bolyp qalyp otyrǵandyqtan, Emmanıýel Makron jeltoqsannyń ortasyna deıin parlamentke arnaıy zań engiziletinin habarlady.

«Ýaqytsha zań Konstıtýtsııamyzda kózdelgendeı memlekettik qyzmet pen el ómirin úzdiksiz qamtamasyz etýge múmkindik beredi», - dep qosty ol.