Makron Frantsııanyń jańa premer-mınıstrin taǵaıyndady

<p>ASTANA.KAZINFORM — Frantsııa prezıdenti Emmanýel Makron ortalyq ońshyl saıasatker Mıshel Barneni premer-mınıstr etip taǵaıyndap, oǵan úkimet qurýdy tapsyrdy, dep jazady <a href="https://www.bbc.com/russian/articles/ce9z7nyeddyo" target="_blank" rel="noopener">VVS.</a> </p>

Barne úkimeti 30 maýsym men 7 shilde aralyǵynda ótken saılaýdan keıin parlament músheleriniń senimine ıe bola ma, joq pa — ázirge belgisiz.

73 jastaǵy Barne — Frantsııadaǵy konservatıvti respýblıkashyldar (LR) partııasynyń ardageri. 

Ol sondaı-aq Eýropalyq Odaq qurylymdarynda jumys istegen jáne 2016-2019 jyldary Ulybrıtanııanyń EO-dan shyǵý sharttary boıynsha kelissózderge jetekshilik etkenimen tanymal.

Makron kezekten tys saılaýdan eki aı ótken soń premer-mınıstrdi taǵaıyndaýǵa májbúr boldy, óıtkeni óziniń tsentrıstik alıansy parlamenttegi ornynan aıyryldy, al ońshyl «Ulttyq birlestik» Marın Le Pen men solshyl partııalar alıansy absolıýtti kópshilik daýysyna ıe bola almady jáne úkimetti óz betinshe qura almady.

Parlamentte 2025 jylǵa arnalǵan bıýdjetti talqylaý kúni jaqyndap keledi. Ol qazan aıynda bastalýy tıis. Al saılaýdan keıin qalyptasqan tyǵyryqtan shyǵý qajettigi kúsheıip keledi.

Makron turaqty úkimetke kepildik beretin joǵary qoldaýǵa ıe adam izdep, premer-mınıstr laýazymyna birneshe kandıdatty qarastyrdy.

Makron keńsesi Barneniń premer-mınıstr bolyp taǵaıyndalǵanyn jarııalaǵan málimdemesinde oǵan «elge jáne frantsýz halqyna qyzmet etetin biriktirýshi úkimet qurý» mindeti júktelgeni aıtylǵan.