Maqpal Jumabaı: Sýperqaharmandarsyz balalardyń betin qazaqqa qaratý qıyn
«Osydan 10 jyl buryn «Balapan» telearnasy ashylǵan bolatyn. Men jalpy, «Balapan» telearnasy – Táýelsizdiktiń eń úlken syıy dep esepteımin. Qazaqsha sóılep, qazaqsha oılaıtyn qazaqtyń sapaly jańa býyny qalyptasty. «Balapan» telearnasy ashylǵaly beri 67 anımatsııalyq joba shyqty», - dedi Maqpal Jumabaı «Otbasy kúni» aıasynda ulttyq tárbıe berý men otbasy qundylyqtaryn damytý máseleleri talqylanǵan dóńgelek ústel otyrysynda.
Telearna basshysy anımatsııa salasyna jeke toqtaldy. Onyń aıtýynsha, balanyń zeıinine, sanasyna tóte jetýdiń joly – anımatsııa.
««Balapan» telearnasy ashylǵaly beri kólemi 18 myń mınýtqa jeterlik 67 anımatsııalyq joba jarııalandy. Bul jumystar jalǵasa beredi. Mysaly qoǵamda ártúrli bastama bar. Latyn qarpindegi qazaq álipbıi dep jatyrmyz. Bıyl «Balapan» telearnasynda sony úıretetin joba jaryqqa shyqqaly otyr. Ulttyq sýperqaharmandar deımiz, sýperqaharmandardy jasamaı, balalardyń betin qazaqqa qaratý óte qıyn. «Balapan» arnasy bul jumysty júıeli túrde júzege asyryp kele jatyr. Balalaryńyz ben nemerelerińizden surap kórińiz – olar qazir Aıdar bolyp, Ertemir bolyp oınaıdy», - dedi ol.