Mahmud Qasymbekov: Elbasy týraly kitaptyń ázerbaıjan tilinde shyǵýynyń sımvoldyq máni bar
«Qazaq-ázerbaıjan halyqtarynyń rýhanı ómirindegi bir eleýli oqıǵanyń ústinde bas qosyp otyrmyz. Taıaýda ǵana Ázerbaıjan Respýblıkasynyń astanasy - Baký qalasynda Qazaqstan Prezıdenti jaıly jazylǵan «Nursultan Nazarbaev. Ómirbaıan» kitaby jaryq kórdi. Árıne, bul kitaptyń baýyrlas ázerbaıjan elinde shyǵýy - bizdiń qazaq halqy úshin, onyń Tuńǵysh Prezıdenti Nursultan Nazarbaev úshin úlken qurmet dep esepteımiz», - dep atap ótti professor Mahmud Qasymbekov.
Onyń aıtýynsha, osydan 5 jyl buryn oqyrmanǵa jol tartqan kitap alǵashynda qazaq jáne orys tilderinde jaryq kórip, qysqa merzim ishinde aǵylshyn, nemis, arab, qytaı, vengr, koreı, serb tilderine aýdarylǵan.
«Endi kitaptyń týystas - ázerbaıjan tilinde jaryq kórýi arqyly onyń sol eldiń ıgiligine aınalǵanyna qýanyshtymyz. Shynynda da, kitaptyń latyn álipbıinde basylyp shyǵýynyń bir sımvoldyq máni bar der edim. Latyn álipbıine kóshemiz dep daıyndyq jumystaryn júrgizip jatqanda osy kitapty ázerbaıjan tilinde - latyn álipbıinde shyǵýy qýantady. Bul neni bildiredi? Latyn álipbıine kóshý qazaq halqy úshin úlken qıyndyq týdyra qoımaıdy. Sebebi, kóp áripterimiz uqsas. Latyn álipbıindegi kóptegen áripter bizdiń tildik erekshelikterimizge beıimdelip tur», - deıdi avtor.
Mahmud Qasymbekov sonymen birge, bul kitaptyń ereksheligi - Elbasy týraly jazylǵan kóptegen derekti týyndylardyń ishindegi «eń shynshyly» ekenin aıtady.
«Sebebi, Elbasynyń janynda uzaq jyldar qyzmet etip júrip, ol kisiniń erekshelikterin, jumysqa berilgendigin jaqyn jerden baıqadym. Túrli qujattar men fotosýretter arqyly osy kitapty jazyp shyqqan bolatynmyn. Osy rette kitapty ázerbaıjan tiline aýdarýǵa muryndyq bolǵan barlyq azamattarǵa alǵysymdy bildirgim keledi», - dep túıdi Mahmud Qasymbekov.