Mahat Sadyq: Prezıdenttiń alǵashqy sheteldik sapary 27 jyl buryn Qytaıǵa jasalǵan edi

ASTANA. QazAqparat - Qazaqstan Prezıdentiniń shetelge tuńǵysh sapary osydan 27 jyl buryn Qytaıǵa jasalǵan bolatyn. Esten ketpes erekshe sapardyń nátıjesi de aıtarlyqtaı boldy. Óıtkeni, sol tusta kóterilgen eki el arasyndaǵy máselelerdiń barlyǵy óz sheshimin taýyp, Qazaqstan men Qytaı myqty strategııalyq áriptes deńgeıine kóterildi.

«1991 jyl. Shilde. El Prezıdentiniń shetelge tuńǵysh sapary. Qytaı Halyq Respýblıkasyna alǵashqy dostyq saparynda Nursultan Nazarbaev 40 saǵat jolda boldy. Onyń 20 saǵatyn ushaqta ótkizdi. QHR tóraǵasy Tszıan Tszemınmen, Qytaı Úkimeti men Beıjiń qalasynyń jáne Shyńjań uıǵyr avtonomııalyq aýdanynyń basshylyǵymen kezdesti. Іri qalalar men úlken kásiporyndarda boldy. Osy joly «Jibek joly» qaıta jańǵyryp, bul temirjol men avtomagıstral tolyq iske qosylǵanda, Tynyq muhıt jaǵalaýymen Eýropany tutastyratyn jol Qazaqstan arqyly ótetindigi aıtylǵan edi. Búginde Ortaazııalyq Iranmen qosqan temir jol jóninde sol kezde sóz etilgen-tuǵyn.

Árıne, Úrimjide ótken aǵaıyndarmen júzdesý erekshe áserli boldy. Tipten protokolda josparlanǵan sapar sondaǵy qandas aǵaıyndardyń ótinishine oraı bir táýlikke sozyldy. Sapar qorytyndysynda Memleket basshysy: «Alystaǵy aǵaıyndarǵa týǵan Otany - Qazaqstan shekarasyn aıqara ashty, sol máseleni tolyqtaı kelisip, sheship kelemin» degeni este. Qazir elimizdegi qazaq tildi jýrnalısterdiń birazy sol alystan kelgen aǵaıyndar, solardyń balalary.

Mahat SADYQ, jýrnalıst