Mahambet Dosmuhambetov úkimettik emes uıymdar ókilderimen kezdesti
Atyraý oblysynda ózekti máselelerdi anyqtaý, talqylaý, sheshý joldaryn qarastyrýǵa
arnalǵan sharaǵa 50-ge jýyq úkimettik emes uıym ókilderi men oblystyq ákimdik basqarma
basshylary qatysty. Fasılıtatsııa formatynda ótken shara úsh sessııadan quraldy.
Top-topqa bólingen qatysýshylar eń sońynda oblystyń damýyna úles qosyp, túıtkildi
máselelerdi sheshýge baǵyttalǵan úzdik jobalaryn oblys ákiminiń nazaryna usyndy.
Jobalardy oń baǵalaǵan aımaq basshysy olardyń júzege asýyn qamtamasyz etýdi tıisti
organdarǵa tapsyrdy.
«Memlekettik mekemelermen birigip, elimizdiń órkendeýine úles qosatyn túrli qoǵamdyq
sharalardy uıymdastyryp, sporttyq, tanymdyq, áleýmettik jobalardy iske asyryp
jatyrsyzdar. Azamattyq qoǵamnyń qalyptasý jáne damý protsesi úkimettik emes
uıymdarmen tyǵyz baılanysty. Osy jumystaryńyz arqyly óńirimizdegi azamattyq
qoǵamnyń damýyna, urpaq densaýlyǵynyń ońalýyna, ekologııanyń jaqsarýyna jáne
áleýetimizdiń artýyna sebep bolatyndaryńyzǵa senimim mol» -dedi oblys ákimi Mahambet
Dosmuhambetov.
Sondaı-aq ákim kezdesýdiń nátıjesi aımaqta qalyptasqan áleýmettik máselelerdi sheshýge,
atqarýshy organdardyń qyzmetine tyń serpin berip, jańa sapalyq deńgeıge kóterýge
septigin tıgizetinin atap ótti.
Oblys ákiminiń orynbasary Baqytgúl Hamenova bıyl jergilikti bıýdjetten memlekettik
áleýmettik tapsyrys sheńberinde 14 baǵyt boıynsha 734 452 880 teńge qarjy bólingenine
toqtaldy. Sonyń negizinde bilim berý, ǵylym, aqparat, dene shynyqtyrý, sport,
azamattardyń densaýlyǵyn saqtaý, salaýatty ómir saltyn nasıhattaý, qorshaǵan ortany
qorǵaý men jastar saıasaty t.b salalardy irgeli jumystar jasalǵan.
«Koronavırýspen kúreste úkimettik emes uıymdar erekshe belsendilik tanytyp, bir
judyryqtaı jumylyp, halyqqa kómek kórsetkenderińiz úshin alǵysymyzdy bildiremiz»,- dedi Baqytgúl Hamenova.
Atyraý oblysynda 667 úkimettik emes uıym tirkelgen. Onyń 543-i – Atyraý qalasynda,
al 124-i aýdandarda jumys isteıdi.