Mahambet Dosmuhambetov: Áleýmettik mańyzy bar taýarlar baǵasyn únemi baqylap otyrmyz

ATYRAÝ. QazAqparat – Búgin Atyraý oblysynyń ákimi Mahambet Dosmuhambetov azyq-túlik baǵasyna baqylaý jasaý úshin birneshe saýda orny men bazardy aralap shyqty. Bul týraly ákim Facebook-tegi paraqshasynda jazdy, dep habarlaıdy QazAqparat.

Ákimniń aıtýynsha, buǵan turǵyndardan túsken «keıbir jerde azyq-túlik baǵalary ósti» degen shaǵym sebep bolǵan.

«Halyqqa eń qajetti áleýmettik mańyzy bar taýarlar – únemi baqylaýymyzda. Oblystyq turaqtandyrý qoryndaǵy azyq-túlikter qalamyzdaǵy «Saraıshyq», «Dına», «Kóktem» men «Nasıha» saýda oryndarynyń ishine tómen baǵamen satylýda. Budan tys ár apta saıyn qala men aýdandarda jármeńkeler ótkizilýde. Oblystyq turaqtandyrý qoryna qosymsha qarjy bóldik. Ol turǵyndardy eń qajetti 12 túrli azyq-túlikpen qamtamasyz etýge jumsalady» dep jazdy ákim áleýmettik jelidegi paraqshasynda.

Ákim syn saǵatta eldik múddeden góri qaltasyn qampaıtyp qalýdy kózdeıtinder týraly da aıtty.

«Shekten shyqqandarǵa qatań sanktsııa qoldanylatyny úkimettik deńgeıde aıtyldy. Elge durys qyzmet etý úshin shaǵyn jáne orta kásipkerlik salasyna kóp jeńildik jasalýda. Eń mańyzdy taýarlardyń baǵasyn kúndelikti qadaǵalaýda ustaımyz. Oblystyq turaqtandyrý qoryna qajet bolsa, taǵy da qarjy bólemiz», - dedi oblys ákimi Mahambet Dosmuhambetov.