Mahambet atyndaǵy Batys Qazaqstan ýnıversıtetiniń 90 jyldyǵy toılandy

ORAL. QazAqparat – «Atameken» óner ortalyǵynda M.Ótemisov atyndaǵy Batys Qazaqstan ýnıversıtetiniń 90 jyldyǵy atalyp ótti, dep habarlaıdy QazAqparat tilshisi.

Mereıtoıǵa qatysqan Batys Qazaqstan oblysynyń ákimi Ǵalı Esqalıev ýnıversıtettiń Qazaqstandaǵy eń baıyrǵy joǵary oqý oryndarynyń biri ekenin atap ótti.

«1932 jyldan bastap búginge deıin úlken tarıhı joldan ótken qasıetti qara shańyraq ózindik brendin qalyptastyryp, elimizdegi joǵarǵy oqý oryndar ishinen oıyp turyp oryn aldy. «Bilimiń bolsa-daǵy ushan-teńiz, paıdasy joq halqyńa qyzmet etpeı» degendeı, búginde ýnıversıtet túlekteri túrli salada tabysty eńbek etip, elimizdiń órkendeýine súbeli úles qosyp júr. Ýnıversıtet ujymy qazirgi jahandaný dáýirinde til úırený, ǵylymǵa bet burý, jańa tehnologııalardy ıgerý, ulttyq mádenıetti damytý, zaman talabyna saı ustazdar daıarlaý, bolashaq chempıondardy ázirleý, halyqaralyq deńgeıde ult múddesin qorǵaý sııaqty mańyzdy baǵyttar boıynsha mamandar daıarlaýda mańyzdy mindetti abyroımen atqaryp keledi. Batys Qazaqstan ýnıversıteti – ózindik dástúrleri men qundylyqtaryn qalyptastyrǵan bilim ordasy. Bul eń aldymen qazaq ǵylymynyń kórnekti tulǵalary, bıologııa ǵylymdarynyń doktory, professor Vsevolod Ivanov, matematık-ǵalym Asan Taımanov, fılologııa ǵylymdarynyń doktory Mátjan Tileýjanov syndy korıfeıler qaldyrǵan asyl mura deýge bolady», dedi óńir basshysy.

Ýnıversıtet rektory, bıologııa ǵylymdarynyń kandıdaty, professor Nurlan Serǵalıevtiń málim etkenindeı, professor-oqytýshylar quramynyń ǵylymı quramy jyldan-jylǵa artyp keledi.

«Qazirgi tańda ýnıversıtette 17 ǵylym doktory, 131 ǵylym kandıdaty, 10 RhD fılosofııa doktory, 159 magıstr qyzmet etedi. Ýnıversıtet kópsalaly bilim jáne ǵylym salasy, áleýmettik ǵylymdar jáne bıznes, tehnıkalyq ǵylymdar jáne tehnologııalar, qyzmet kórsetý, bilim berý, gýmanıtarlyq ǵylymdar, quqyq, óner, jaratylystaný ǵylymdary baǵyttary boıynsha kadrlar daıarlaýdy júzege asyrady. JOO-da qurylǵan ǵylymı mektepter Qazaqstanda jáne odan tys jerlerde keńinen tanymal. Ýnıversıtette pedagogıkalyq, fızıka-matematıkalyq, bıologııalyq, tarıhı, hımııalyq, geografııalyq, ekologııalyq, fılologııalyq, saıası, ekonomıkalyq, áleýmettik ǵylymdar boıynsha zertteýler júrgiziledi. Ýnıversıtettiń osy jáne basqa da kóptegen jetistikteri bizdiń basty kapıtalymyz bolyp tabylatyn búkil ujymnyń, professorlyq-oqytýshylyq quramnyń aıanbaı eńbek etýiniń arqasynda múmkin boldy. Batys Qazaqstan ýnıversıteti óńirdegi bilim, ǵylym men mádenıettiń jetekshi ortalyǵy retinde óz qyzmetin úzdiksiz jetildire bermek»,- dedi N.Serǵalıev.

Toqsan jyldyq mereıtoıǵa oraı bilim ordasynyń úzdik ustazdary marapattalyp, merekelik kontsert qoıyldy. Sondaı-aq jańa kitaptardyń tanystyrylymy boldy.

Sýretterdi túsirgen Dınara Nasyr