Mahachkalada janarmaı quıý stantsııasyndaǵy jarylystan qaza bolǵandar sany 27-ge jetti

MAHAChKALA. QazAqparat – Daǵystan astanasynda janarmaı quıý beketinde bolǵan jarylystan qaza tapqandar sany 27 adamǵa jetti, dep habarlaıdy QazAqparat TASS-qa silteme jasap.

«Jarylys saldarynan barlyǵy 102 adam zardap shekti, onyń ishinde, ókinishke oraı, 27 adam qaza tapty», - delingen Reseı Tótenshe jaǵdaılar mınıstrliginiń Telegram-arnasynda.

Úıindilerdi ashý, zardap shekkenderdi izdeý jumystary jalǵasyp jatyr. Oqıǵa ornyna kınologtar da tartylǵan.

Daǵystan basshysy Sergeı Melıkovtyń naqtylaýynsha, qaza tapqandar arasynda úsh bala bar.

Jarylys sebebi anyqtalýda.

«Quqyq qorǵaý organdary tekserý júrgizip jatyr, onyń qorytyndysy boıynsha ádildik ornap, daǵystandyqtardyń qaýipsizdigin qamtamasyz etý úshin qoldan kelgenniń barlyǵy jasalady», - dep jazdy Melıkov.

Janarmaı quıý beketinde jarylystan adamdardyń kóz jumýyna baılanysty Daǵystanda 15 tamyz aza tutý kúni bolyp jarııalandy.

Buǵan deıin Mahachkaladaǵy jarylys saldarynan 12 adam qaza tapqany habarlanǵan bolatyn.