Mahabbat Bekbosynova koronavırýs kóbine qaı jerlerde juǵatynyn aıtty

NUR-SULTAN. QazAqparat - Naýqastardyń 90 paıyzy ınfektsııany otbasylyq toılarda juqtyrǵan. Bul týraly Ulttyq ǵylymı kardıohırýrgııa ortalyǵy basqarma tóraǵasynyń mindetin atqarýshy Mahabbat Bekbosynova aıtty, dep habarlaıdy QazAqparat tilshisi.

«Jaz aılarynda kovıd ortalyǵy retinde jumys istegen kezimizde, koronovırýstyń aýyr formasyna shaldyqqan naýqastardy qabyldadyq. Em-dom alǵan naýqastardyń 90 paıyzy ınfektsııany túrli is-sharalarda, ıaǵnı úılený toıynda, týǵan kún, qudalyq sekildi dástúrli jıyndarda juqtyrǵan. Bul - óz kezeginde úlken problema. Sondyqtan adamdar kóp jınalatyn jerge barmaýǵa keńes beremin. Negizgi talaptardy ustanyp júrgen, indet juqtyrmaǵan jaqsy tanys adamdarmen kezdesýge bolatyn shyǵar, alaıda otbasylyq jáne basqa da úlken jıyndarǵa, saýda ortalyqtaryna barǵan áli de qaýipti», - dedi M. Bekbosynova.

Onyń aıtýynsha, statıstıka boıynsha ınfektsııa kóbine qoǵamdyq kólikte, saýda ortalyqtarynda, kópqabatty úılerdiń lıftisinde taraıdy.

«Saqtyq is-sharalaryna mán berip, maska taǵyp, araqashyqty saqtaý kerek. Aýyrǵanda kóshege shyǵýdyń qajeti joq. Osy jaıynda dárigerge habarlaǵan jón. Turǵylyqty jerdegi emhanamen baılanysta bolý qajet. Іndet jaıynda erterek habarlansa, em-dom nátıjeli bolady. Eń bastysy, jaz aılaryndaǵy ahýal qaıtalanbaýy tıis. Ol kezde indettiń taralý oshaǵy keńeıgen edi. Bul óz kezeginde medıtsına qyzmetkerleri úshin úlken synaq boldy. Alda mereke kúnderi kele jatyr, barsha Qazaqstan halqyn Táýelsizdik kúnimen quttyqtaımyn!», - dedi Mahabbat Bekbosynova.

Aıta keteıik, ortalyq basshysy koronavırýstan keıingi sındrom jobasy jaıynda túsinik berdi.