Maǵzum Myrzaǵalıev janýardy qasaqana óltirgenderdi jazalaýǵa qatysty pikir bildirdi

NUR-SULTAN. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev janýardy qasaqana óltirgenderge qandaı jaza qoldanylatynyna qatysty tilshilerdiń suraǵyna jaýap berdi, dep habarlaıdy QazAqparat tilshisi.

«Janýarlarǵa jaýapkershilikpen qaraý týraly» zań jobasy jalpy janýarlarǵa adamgershilikpen ári jaýapty túrde qaraý máselelerin retteıdi», - dedi Maǵzum Myrzaǵalıev Úkimettiń baspasóz ortalyǵynda ótken brıfıng barysynda.

Onyń aıtýynsha, janýarlarǵa qatygezdik jasaǵandarǵa jazany kúsheıtý úshin Ákimshilik jáne Qylmystyq kodeksterge ózgeris engiziledi.

«Tıisti ózgerister Parlamentte ázirlenedi. Biraq aldyn ala aıtarym, ıá, mundaı normalar qarastyrylýda. Qylmystyq zańnamaǵa sáıkes qazir ondaı adamdarǵa qandaı jaza taǵaıyndalatynyn aıtý qıyn. Sebebi qujat áli de talqylanýy kerek», - dedi ol.