Maǵzum Myrzaǵalıev: Qazaqstanda qoqys shyǵarý tarıfteri tómen
«Memleket basshysy Qasym-Jomart Toqaev ekologııa máselelerine erekshe nazar aýdarǵanyn barshamyz bilemiz. Jaqynda ol bizdiń mınıstrlikke eki mańyzdy mindetti qoıdy: «Waste to Energy» tehnologııasyn engizý úshin zańnamalyq baza men qolaıly jaǵdaılardy qamtamasyz etýdi, sonymen qatar eldi mekenderdiń mańynda zańsyz qoqystardy tastaýǵa jol bermeý jáne ony joıý boıynsha júıeli sharalardy qabyldaýdy tapsyrdy», - dedi Maǵzum Myrzaǵalıev OKQ-da ótken baspasóz máslıhatynda.
Mınıstr Memleket basshysynyń «Waste to Energy» tehnologııasynyń zańnamalyq turǵyda engizý jónindegi tapsyrmasyna qatysty mınıstrlik birqatar jumys atqarǵanyn eske saldy.
«Men birneshe ret aıtqandaı, elimizde qaldyqtardy qaıta óńdeý úlesi óte tómen. Bar-joǵy 15 paıyz ǵana. Al Eýropa elderinde bul kórsetkish 2 ese, ıaǵnı orta eseppen 30 paıyzdy quraıdy. «Jasyl ekonomıka» tujyrymdamasyna sáıkes biz bul kórsetkishti 2030 jylǵa qaraı 40 paıyzǵa deıin jetkizýimiz kerek. Alaıda búgin Qazaqstanda qoqys shyǵarý tarıfteri tómen jáne ol jerde qatty turmystyq qaldyqtardy qaıta óńdeý – kádege jaratý shyǵyndary eskerilmegen. Sondyqtan bul salanyń ınvestıtsııalyq tartymdylyǵy óte tómen», - dedi ol.
Maǵzum Myrzaǵalıev negizi «Waste to Energy» tehnologııasy jeke ınvestorlardy qyzyqtarytynyn aıtady. Óıtkeni qoqystardy jaǵý nátıjesinde elektr energııasy óndirilip, jalpy elektr jelisine satylady. Kelesi jyly osyndaı zaýyt qurylysyna ınvestorlar arasynda ashyq aýktsıon ótkizý josparlanyp otyr.
«Elektr energııasynyń eń az qunyn kim usynsa, sol aýktsıonnyń jeńimpazy bolyp atalady. Memleket basshysynyń tapsyrmasy boıynsha tıisti zań jobasy ázirlendi. Májilis ony maquldady. Kúzde Parlament Senatynda qaralady», - dedi ol.