Maǵzum Myrzaǵalıev: Balyq jeminiń ımportynan qutylý úshin bes oblysta zaýyt salý kerek

NUR-SULTAN. QazAqparat - Ekologııa, geologııa jáne tabıǵı resýrstar mınıstri Maǵzum Myrzaǵalıev balyq sharýashylyǵynda jemniń ımportyn toqtatmaı, bul salany damytý qıyn. Sol sebepti mınıstr bes oblysta bes zaýyt salý kerektigin aıtady, dep habarlaıdy QazAqparat tilshisi.

«Mańyzdy máselelerdiń biri – jemmen qamtamasyz etý. Balyqtyń ózindik qunynyń qurylymynda jemge jumsalatyn shyǵyndar jalpy shyǵystardyń 70%-yn quraıdy. Sondyqtan qurama jemniń sapasy men tıimdiligi – balyqty óndiristik ósirý rentabeldiliginiń sheshýshi faktory sanalady. Máselen, 2019 jyly 7 myń tonna balyq ósirý úshin 12,5 myń tonna jem qajet boldy. Búgingi tańda Qazaqstanda balyq jemin óndirýmen jalpy qýaty jylyna 136 myń tonna bolatyn 14 otandyq kásiporyn aınalysady. Alaıda ondaǵy jem tuqylarǵa ǵana jaramdy», - dedi Maǵzum Myrzaǵalıev Úkimet otyrysynda.

Sondyqtan, balyqtyń qundy túrlerin ósirý úshin bıznes ımporttyq jem satyp alýdy jón kóredi. 2019 jyly 786 tonna alabalyq jáne 178 tonna bekire ósirý úshin 1,2 myń tonna ımporttyq jem («Aller Aqua» kompanııasy óndirgen) satyp alynǵan.

«Árqaısysynyń qýaty jylyna 80 myń tonna bolatyn zamanǵa saı 5 zaýyt salýǵa bıznesti tartý qajet. Olardy Almaty, Aqmola, Shyǵys Qazaqstan, Túrkistan jáne Mańǵystaý oblystarynda ornalastyrǵan jón dep esepteımiz. Osyǵan oraı mınıstrlik otandyq ınvestorlardyń qatysýymen balyq jemin óndiretin álemge belgili danııalyq «Aller Aqua» kompanııasymen birlesken zaýyt salý boıynsha kelissózderdi bastady. Bul óz kezeginde ımportqa táýeldilikti tómendetýge, bızneske qarjylyq júktemeni azaıtýǵa, sondaı-aq jańa jumys oryndaryn qurýǵa múmkindik beredi», - dedi mınıstr.