Maǵjantanýshylar sany jyl saıyn artyp keledi - ǵalym

PETROPAVL. QazAqparat - Petropavlda «Maǵjan Jumabaev murasy men álemdik rýhanııat» halyqaralyq ǵylymı-praktıkalyq konferentsııasy ótip jatyr, dep habarlaıdy QazAqparat tilshisi.

M.Qozybaev atyndaǵy Soltústik Qazaqstan memlekettik ýnıversıtetinde ótip jatqan konferentsııaǵa oblys ákimi Qumar Aqsaqalov, Túrksoı bas hatshysy Dúısen Qaseıinov, Jazýshylar odaǵynyń tóraǵasy Ulyqbek Esdáýlet, L.N.Gýmılev atyndaǵy Eýrazııa ulttyq ýnıversıtetiniń professory, fılologııa ǵylymdarynyń doktory Serik Negimov, Gazı Hýlııa atyndaǵy Túrkııa ýnıversıtetiniń professory Kasapoglý Chengel jáne basqa da túrli elderdiń ǵalymdary qatysty.

Oblys ákimi konferentsııany asha otyryp, Maǵjan Jumabaevtyń eliniń jarqyn bolashaǵyn armandaǵanyn atap ótti.

«Ol halyqtyń taǵdyry, erteńi týraly jazdy. Balalardy oqytyp, muǵalimderdi daıyndady. Olar úshin kitaptar jazyp, álem ádebıetin aýdardy. M.Jumabaev halyqtyń bolashaǵy úshin kúresetin kúshtiń jastar ekenin aıtty», - dedi Q.Aqsaqalov.

Tarıh ǵylymdarynyń kandıdaty, oblystyq arhıvtiń dırektory Sáýle Malıkova resmı qujattarda M.Jumabaevtyń týǵan kúni 1893 jyldyń 25 maýsymy dep kórsetilgenin atap ótti.

«Jyl saıyn uly qazaq aqynynyń shyǵarmashylyǵyn zertteýmen aınalysatyn adamdar sany artyp jatyr. Buǵan Maǵjan Jumabaevtyń ómiri týraly jańa derekterdiń paıda bolýy yqpal etýde», - dedi Sáýle Malıkova.

Konferentsııada oblys ákimi Maǵjan Jumabaevtyń 125 jyldyǵyna oraı, qurmetti qonaqtar men aqynnyń ómiri men shyǵarmashylyǵyn zertteýge úles qosqan is-sharaǵa qatysýshylarǵa tós belgileri tabys etti.