Maǵjan Jumabaıulynyń buryn belgisiz bolyp kelgen 30-ǵa jýyq óleńderi men áńgimeleri tabyldy

ALMATY. 18 qarasha. QazAqparat - Maǵjantanýshy, Qaınar ýnıversıtetiniń professory, fılologııa ǵylymdarynyń kandıdaty Baqytjamal Qanarbaevanyń aıtýynsha, Maǵjan Jumabaıulynyń shyǵarmalary áli tolyq jınaqtalǵan joq.

«20 jyldyń ishinde óz kúshimmen aqynnyń latyn jáne tóte jazýmen jazylǵan 30-ǵa jýyq óleńderi men áńgimelerin taptym. Endi olardy aldaǵy ýaqytta jeke jınaq etip shyǵarsam degen armanym bar. Máskeýde júrgende M.Jumabaıuly Túrkimenstan men Qyrǵyzstannyń batyrlar jyryn qurastyryp shyǵarǵan eken. Qyrǵyz mektepterine arnalǵan oqýlyǵy da bar kórinedi. Ol úshin Qyrǵyzstan muraǵattaryn aqtarý kerek. Ózbekstanda da kóp eńbekteri bar kórinedi», - deıdi B.Qanarbaeva. Ǵalymnyń aıtýynsha, Halel Dosmuhamedov Máskeýdegi Joǵary ádebı-kórkem ınstıtýtynda Valerıı Brıýsevke «qazaqtyń Pýshkıni» dep tanystyrǵan aqynnyń shyǵarmalary osyndaǵy Kúnshyǵys eńbekshileri ýnıversıtetiniń janynan qurylǵan qazaq jastarynyń «Jerlestik» uıymynyń 1924 jyly 24-qarashadaǵy sheshiminen keıin Qazaqstanda jarııalanbaǵan. Oǵan 1923 jyly Tashkentte shyqqan óleńder jınaǵyn talqylaǵan «Jerlestik» uıymynyń: «Maǵjannyń óleńderi budan bylaı gazet-jýrnal betterinde tekserýsiz basylmasyn. Maǵjannyń kitabynyń basylýy men taralýyna sebepshi bolǵandar jaýapqa tartylsyn» degen úkimi óz yqpalyn tıgizgen. Degenmen aqynmen dostyq qatynasta bolǵan keıbir syrlas áriptesteri onyń keıbir shyǵarmalaryn búrkenshik esimmen nemese óz attarynan jarııalap, qalamaqymen qoldaý kórsetýi múmkin degen boljam bar. Bul úlken eńbekti qajet etetin beınetti jumys. Oǵan ózge zertteýshiler de atsalysýy qajet.