Magıstratýraǵa túsetin talapkerlerdi tirkeý 18 maýsymda bastalady

NUR-SULTAN. QazAqparat - Magıstratýraǵa túsýge arnalǵan keshendi testileýge qatysý úshin tirkeý 18 maýsym kúni bastalady. Tirkeý Ulttyq testileý ortalyǵynyń app.testcenter.kz saıtynda júrgiziledi, dep habarlaıdy QazAqparat.

«Tirkeý kezinde testileý ótkiziletin oryndy oqýǵa túsýshi ózi tańdaıdy. Sondaı-aq Ulttyq testileý ortalyǵynyń saıtynda baıqaý synaǵynan ótýge bolady. Emtıhandar 20 shildeden bastalyp, 10 tamyzǵa deıin jalǵasady», – deıdi QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.

Magıstratýraǵa túsý formatyna keletin bolsaq, bıyl eshqandaı ózgeris joq. Testileý nátıjesimen kelispegen jaǵdaıda testilenýshi KT aıaqtalǵannan keıin 30 mınýttyń ishinde apellıatsııaǵa ótinish bere alady.

«Magıstratýraǵa túsýge arnalǵan testileý 3 bólimnen turady: shet tili boıynsha test, oqýǵa daıyndyǵyn anyqtaýǵa arnalǵan jáne bilim berý baǵdarlamalary tobynyń beıini boıynsha test. Shet tilin meńgerýdiń jalpy halyqaralyq quzyretterine (standarttaryna) sáıkes shet tilin meńgergenin rastaıtyn bir halyqaralyq sertıfıkaty bar magıstratýraǵa túsýshiler shet tili boıynsha keshendi testileýden bosatylady», – dep atap ótti A.Toıbaev.

Aıta ketken jón, bıyl memlekettik bilim tapsyrysy boıynsha magıstratýraǵa túsý úshin shekti ball ózgerissiz qaldy - 75 ball.

Oqýǵa aqyly negizde túsý úshin 50 ball jınaý qajet.

Emtıhan tórt saǵatqa deıin jalǵasady.

Esterińizge sala keteıik, bakalavrıat boıynsha granttardyń jalpy sany - 56 561, magıstratýra – 13 263, doktorantýraǵa 1890 grant bólingen.

Kadr daıarlaýǵa arnalǵan granttar suranysqa ıe baǵyttar boıynsha bólinedi.