Magıstratýraǵa 7 myńǵa jýyq ótinish berildi - BǴM

NUR-SULTAN. QazAqparat - Ekinshi qabyldaý qorytyndysy boıynsha magıstratýraǵa 6 778 ótinish kelip tústi. Doktorantýrada oqý úshin 700-den astam ótinish berildi, dep habarlaıdy QazAqparat Bilim jáne ǵylym mınıstrligine silteme jasap.

«Úmitkerler jylyna eki ret magıstratýra men doktorantýraǵa qujat tapsyra alady degen sheshim qabyldanǵan. Bul jańalyqty qandaı da bir sebepterge baılanysty alǵashqy qabyldaý naýqanynda ótinish berýge múmkindigi bolmaǵan myńdaǵan qazaqstandyq qýanyshpen qarsy aldy. Endi testileýdi sátti tapsyrǵan 7 myńǵa jýyq úmitker jazǵy qabyldaý qorytyndysy boıynsha artyq qalǵan granttardy jeńip alady», – dep atap ótti Bilim jáne ǵylym vıtse-mınıstri Qýanysh Erǵalıev.

Aıta keteıik, magıstratýraǵa keshendi testileý jáne doktorantýraǵa túsý emtıhandary 2-11 jeltoqsan aralyǵynda ótkiziledi.

TOEFL ITP testiniń nátıjelerimen doktorantýraǵa túsýshiler aǵylshyn tilin bilýge arnalǵan qosymsha test tapsyrady. Ol emtıhanyn tapsyrǵanǵa deıin ótkiziledi. Test tapsyrmasy jalpy 100 suraqtan turady.

Vedomstvonyń málimetinshe, aǵylshyn tilin bilýge arnalǵan qosymsha testileý «ótti» nemese «ótken joq» nysanynda baǵalanady. «Ótti» baǵasyn alý úshin keminde 75 ball jınaý kerek. Aǵylshyn tilin bilý deńgeıin tekserý, keshendi testileý jáne qabyldaý emtıhandary óńirlik testileý ortalyqtarynda júrgiziledi.

Bilim berý granttaryn taǵaıyndaý konkýrsyna qatysý úshin qujattar 2021 jylǵy 25 jeltoqsanǵa deıin qabyldanady. Bul rette magıstratýraǵa jáne doktorantýraǵa qysqy qabyldaý 2021 jylǵy 2-11 jeltoqsan aralyǵynda ótkizilgen testileý jáne túsý emtıhandarynyń nátıjeleri boıynsha júzege asyrylady.

Magıstratýra men doktorantýraǵa qabyldaý 2021 jyldyń 26 jeltoqsany men 2022 jyldyń 10 qańtary aralyǵynda ótedi.