Magıstratýra men doktorantýraǵa qujat qabyldaý merzimi uzartyldy
Esterińizge sala keteıik, 1 qarashada magıstratýraǵa túsý úshin ekinshi keshendi testileýge jáne doktorantýraǵa túsý emtıhandaryna qujattar qabyldaý bastalǵany týraly jarııalanǵan bolatyn.
Qazaqstandyqtardyń ótinishterin eskere otyryp, endi keshendi testileýge qatysý úshin ótinim berý merzimi taǵy úsh kúnge uzartyldy.
Buǵan deıin Bilim jáne ǵylym mınıstri Ashat Aımaǵambetov áleýmettik jelilerdegi paraqshalarynda magıstratýra men doktorantýraǵa qabyldaý jylyna eki ret, ıaǵnı dástúrli túrde jazda jáne qosymsha qysta ótetinin habarlaǵan bolatyn.
«Mınıstrlik stýdentterdiń múddelerin árqashan birinshi orynǵa qoıady. Sondyqtan mınıstr oqýǵa túsý úshin taǵy bir múmkindik berý týraly sheshim qabyldady. Testterdi sátti tapsyrǵan jaǵdaıda úmitkerler jazǵy qabyldaý qorytyndysy boıynsha artyq qalǵan granttardy utyp ala alady» , — dep atap ótti Bilim jáne ǵylym vıtse-mınıstri Qýanysh Erǵalıev.
Esterińizge sala keteıik, magıstratýraǵa ekinshi keshendi testileýge jáne doktorantýraǵa túsý emtıhandaryna qatysý úshin tirkelý QR BǴM Ulttyq testileý ortalyǵynyń app.testcenter.kz saıty arqyly júrgiziledi. Magıstratýraǵa keshendi testileý jáne doktorantýraǵa túsý emtıhandary 2021 jylǵy 19 qarasha bastalyp, 11 jeltoqsanǵa deıin jalǵasady.
Bilim berý granttaryn taǵaıyndaý konkýrsyna qatysý úshin qujattar 2021 jylǵy 25 jeltoqsanǵa deıin qabyldanady. Oqýǵa qabyldaý 2021 jyldyń 26 jeltoqsany men 2022 jyldyń 10 qańtary aralyǵynda júrgiziledi.