Magıstratýra emtıhanyna shpargalka aparǵan 100-ge jýyq talapker oqýǵa túsý múmkindiginen aıyryldy
Testileý bastalǵaly 149 qatysýshynyń nátıjesi joıyldy.
Onyń ishinde 92 oqýǵa túsýshi smartfon, shpargalka jáne basqa da tyıym salynǵan zattardy alyp ótýge tyrysqany úshin test tapsyrý múmkindiginen aıyryldy.
Keshendi testileý kezinde ereje buzǵany úshin aýdıtorııadan 57 adam shyǵarylyp, olardyń nátıjesi joıyldy.
«Ulttyq biryńǵaı testileýdegi sekildi keshendi testileýge kirgizý úsh deńgeıli júıe boıynsha júzege asyrylady: Face ID jeke basyn sáıkestendirý arqyly, jeke kýálik boıynsha, sondaı-aq otyrǵyzý ornynda jeke basyn sáıkestendirý júrgiziledi. Qabyldanǵan sharalar arqasynda testileýde bógde tulǵalar anyqtalǵan joq», - dedi Ulttyq testileý ortalyǵynyń dırektory Rýslan Emelbaev.
Esterińizge sala ketsek, magıstratýraǵa túsýge arnalǵan keshendi testileýge 43 myńǵa jýyq ótinish kelip tústi.
Magıstratýrada oqýǵa 13 myńnan astam grant bólindi. Bıyl magıstratýraǵa túsýge arnalǵan keshendi testileý 22 shildede bastaldy jáne 10 tamyzǵa deıin jalǵasady.
Bıyl magıstratýraǵa túsý erejesi ózgergen joq. Keshendi testileý úsh bloktan turady: shet tili boıynsha test, oqýǵa daıyndyǵyn anyqtaýǵa arnalǵan test jáne bilim berý baǵdarlamalary tobynyń beıini boıynsha test.
Shet tilin meńgergenin rastaıtyn halyqaralyq sertıfıkattardyń biri bar oqýǵa túsýshiler shet tili boıynsha testten bosatylady.
Testileý nátıjesimen kelispegen jaǵdaıda onlaın apellıatsııaǵa berý múmkindigi qamtamasyz etilgen.
Testileý aıaqtalǵannan keıin 30 mınýt ishinde oqýǵa túsýshi birden apellıatsııaǵa ótinish bere alady. Apellıatsııa bes kún ishinde qaralady.
Testileý sertıfıkaty oqýǵa túsýshiniń jeke kabınetinde qoljetimdi bolady.
Shekti ball da ózgerissiz qaldy: ǵylymı-pedagogıkalyq baǵyt boıynsha magıstratýraǵa túsý úshin 75 ball, beıindik baǵyt boıynsha 50 ball jınaý qajet.