Maǵan kitaphanaǵa kelip daýys bergen unaıdy - Arystanbek Muhamedıuly

NUR-SULTAN. QazAqparat - QR Mádenıet jáne sport mınıstri Arystanbek Muhamedıuly QR Prezıdenti saılaýynda daýys berdi, dep habarlaıdy QazAqparat tilshisi.

Mınıstr óz tańdaýyn QR Ulttyq akademııalyq kitaphanasyndaǵy №111 saılaý ýchaskesinde jasady.

«Men óz daýsymdy turaqtylyqqa, Qazaqstannyń keleshegi úshin berdim. Qazirgi ýaqytta Qazaqstan dúnıejúzine syıly, óz orny bar memleket. Saıasatta da, óner jaǵynan da maqtanyshpen jetistikterimizdi aıta alamyz. Árıne búgingi saılaýǵa búkil Qazaqstannyń qatysyp jatqany óte qýanyshty», - dedi mınıstr jýrnalısterge bergen suhbatynda.

«Meniń otbasym basqa ýchaskede tirkelgen. Osy ýchaskege ózim suranyp keldim. Sebebi, basqa ákimshilik ǵımarattarǵa qaraǵanda kitaphanada daýys bergen unaıdy», - dedi A. Muhamedıuly.

Eske sala ketsek, búgin Qazaqstan Prezıdentin kezekten tys saılaý bastaldy. QR Prezıdentiniń kezekten tys saılaýynda el ishinde jáne shet elderde 9 968 daýys berý ýchaskesi jumys isteıdi. Saılaý týraly Konstıtýtsııalyq zańǵa sáıkes, daýys berý ýaqyty standartty (saǵat 7.00-20.00 aralyǵy) bolady.