Advokat Ýrazbahova: Meniń ústimnen qozǵalǵan qylmystyq is — zańsyz
Advokat Janna Ýrazbahova Instagram-daǵy paraqshasynda jazba jarııalap, bul ony qylmystyq isten shettetýdiń, lıtsenzııadan aıyrýdyń alǵashqy áreketi emes ekenin atap ótti.
— Bizdiń Qazaqstan jańa bolǵanymen, biraq jumys isteý ádisteri sol kúıi eski. Ásirese, bizde olıgarhat sonshalyqty názik, sezimtal, ári shyndyqty unatpaıdy. Jumysyńdy jaqsy oryndaǵan kezde bunyń kóptegen adamǵa unamaıtynyna daıyn bolyńyz. Men buny advokatýranyń birinshi kúninen bastap bildim. Sondyqtan quqyq qorǵaý organdarynyń kóptegen ókilderine jekkórinishti boldym. Bul meni qylmystyq isten shettetýdiń, lıtsenzııadan aıyrýdyń alǵashqy áreketi emes. Qoqan-loqy da, artymnan ańdý da boldy. Sol sebepti osyndaı jaǵdaılarǵa baıaǵydan tótep bere alamyn. Men QK men QІJK-ny jáne «Advokattyq qyzmet týraly» zańdy jaqsy bilemin. Birde-bir ret zańnan attap ótýge jol bermedim, — dep jazdy ol.
Ýrazbahova qylmystyq is zańsyz qozǵalǵanyn aıtty. Sebebi ol qylmystyq istiń materıaldarymen tanyspaǵan.
— Meni sotqa deıingi tergeýdiń qupııasyn ashty dep aıyptaý kúlkili. Sebebi jábirlenýshiler Lıhachev pen Belovıchtiń múddesi úshin Kozachkov bir jyldan beri barlyq aqparatty jazyp keledi, tipti is boıynsha qujattardy jarııalaıdy… Biz qazir is boıynsha alǵa jyljı bastadyq. Tergeý sýdıasy is boıynsha zańdylyqtyń buzylýy men uzaqqa sozý deregin moıyndady, tipti osy fakt boıynsha polıtsııa departamentine jeke qaýly shyǵardy. Bul tergeýshiniń egosyna qatty áser etti. Almaty qalasy polıtsııa departamentiniń maǵan qatysty qozǵaǵan qylmystyq isi zańsyz. Sebebi men qylmystyq istiń materıaldaryn kórmedim. Olarmen tanyspadym. Olardy qalaı jarııa ete alamyn? , — deıdi advokat.
Sonymen qatar, Janna Ýrazbahova sotqa deıingi tergeýdiń qupııasyn jarııa etpeý týraly eshqandaı qolhat bermegenin alǵa tartty. Budan bólek prokýratýraǵa qylmystyq isti zańsyz tirkeýge qatysty shaǵym daıyndap jatqanyn aıtty.
— Tergeý áli júrip jatyr. Eń bastysy, men sotqa deıingi tergeýdiń qupııasyn jarııa etpeý týraly eshqandaı qolhat bergen joqpyn, al bul qujatsyz menen eshkim kúdiktene almaıdy. Biz qazirdiń ózinde prokýratýraǵa qylmystyq isti zańsyz tirkeýge qatysty shaǵym daıyndap jatyrmyz. Men sizderdi habardar etip otyramyn. Bul is qorǵaýdy júzege asyrýda advokattarǵa qalaı kedergi keltiretininiń kórsetkishi dep sanaımyn. Eń bastysy, olar isti tergeý barysynda jaǵymsyz advokattardy shettetedi, — dep túıindedi advokat.
Eske salsaq, áleýmettik jelide marqum Saltanat Núkenovanyń múddesin qorǵaǵan advokat Janna Ýrazbahovanyń ústinen qylmystyq is qozǵalǵany jaıly aqparat tarady. Polıtsııa bul aqparatty rastady.