Maǵan dese atý jazasy bolsyn, biraq qarjy urlady dep aıyptamańyzdar - Arystanbek Muhamedıuly

ASTANA. QazAqparat – Ulttyq mýzeıdiń burynǵy dırektory Arystanbek Muhamedıuly sot aldyndaǵy sońǵy sózinde kez kelgen jazaǵa kelisetinin aıtty, biraq aqsha jymqyrdy dep aıyptamaýdy surady, dep habarlaıdy QazAqparat tilshisi.

Biz «Altyn adam» artefaktilerin saqtap, elge jetkizdik. Alaıda, ol urlanyp ketken dúnıe sekildi, jaǵymsyz sıpat alyp otyr. «Altyn adam» qazir ulttyq mýzeıde tur. Osyndaı áreketten keıin kim «Altyn adamnyń» kórmesin ótkizgisi keledi? Eshqandaı tarap problemalyq tarıhy bar kórmeni qabyldaǵysy kelmeıdi

, - dedi Arystanbek Muhamedıuly sottaǵy sońǵy sózinde.

Ol kez kelgen jazany óteýge daıyn ekendigin aıtty, biraq orynsyz aıyptamaýdy surady.

Men kez kelgen jazaǵa kelisemin, tipti atýǵa da, tek qarjy urlady dep aıyp taqpańyzdar. Ar bárinen qymbat. Qazaqta maqal bar, «Ólimnen uıat kúshti» degen. 60 jasyma deıin ómirdiń qyzyǵyn da, shyjyǵyn da tattym, biraq laıyqty ómir súrdim

, - dedi A. Muhamedıuly.

Buǵan deıin Arystanbek Muhamedıuly sot aldyndaǵy sońǵy sózin aıtqanyn habarlaǵan edik.

Eske sala keteıik, ótken jyly mamyrda sot sanktsııasymen sol kezdegi Ulttyq mýzeı dırektory Arystanbek Muhamedıuly qamaýǵa alyndy.

Sybaılas jemqorlyqqa qarsy is-qımyl qyzmeti mýzeıdiń eks-basshysyna «Altyn adamnyń» álem mýzeılerine sherýi» halyqaralyq kórmesin ótkizý jónindegi memlekettik satyp alý týraly shart aıasynda Qazaqstan Respýblıkasy Ulttyq mýzeıiniń laýazymdy adamdaryna jáne basqa da tulǵalarǵa bıýdjet qarajatyn jymqyrý belgileri boıynsha aıyp taǵyp, tergep-tekserýdi júrgizgen edi.

Sot Arystanbek Muhamedıulyn úıqamaqqa aýystyrýdan bas tartty.

Sondaı-aq, Arystanbek Muhamedıuly men sybaılastaryna qandaı aıyp taǵylǵanyn jazǵan bolatynbyz.

Kezekti sot otyrysynda Arystanbek Muhamedıuly óz kinásin moıyndamaıtynyn aıtty. https://kaz.inform.kz/news/arystanbek-muhamediuly-sotta-kinasin-moyyndamady_a4057776

Al, Antıkor «Dıplomat» qonaqúıine qatysty Arystanbek Muhamadıulyn tergeý aıaqtalǵanyn habarlaǵan edi.