MadMen tobynyń ánshileri tanymaldyǵyn paıdalanyp, esirtki satyp kelgen - ІІM

NUR-SULTAN. QazAqparat – Іshki ister mınıstrligi Esirtki qylmysyna qarsy is-qımyl departamentiniń basqarma bastyǵy Baqytjan Ámirhanov esirtki saýdasyna qatysy bar rezonanstyq oqıǵalar týraly málimet berdi, dep habarlaıdy QazAqparat tilshisi.

Mınıstrlik ókiliniń aıtýynsha, aldyńǵy jyldarmen salystyrǵanda Qazaqstanda esirtki óndiretin zerthanalardyń sany artyp keledi.

Mysaly, 2019 jyly 3 zerthana, 2020 jyly 8 zerthana anyqtalǵan. Bıyl 5 aıdyń ózinde ǵana 10 zerthana tabylǵan.

«El ishinde sıntetıkalyq zerthana jasaýshylar kóbeıip keledi. Sonyń biri Qaraǵandy oblysynda tirkeldi. Naýryz aıynda qylmystyq toptyq quryqtadyq. Olar ár qalada zerthanalar uıymdastyryp, esirtki óndirgen. Tintý kezinde 4 kelideı mefedron degen esirtki zatyn tárkiledik. Basqa da qosymsha hımııalyq zattar men prekýsorlaryn aınalymnan shyǵardyq. Eń qıyny sıntetıkalyq esirtki óndirisne qajet qosymsha zattardyń saýdasyna tyıym salynbaǵan», - deıdi Esirtki qylmysyna qarsy is-qımyl departamenttiń ókili.

Ol, sondaı-aq, esirtki saýdasyn uıymdastyrdy degen kúdikke ilingen Mad Men mýzykalyq tobynyń jaǵdaıyna toqtaldy.

«Almaty qalasynda MadMen degen mýzykalyq top quryqtaldy. Toptaǵy 8 adamdy ustap, tórteýin jaýapqa tarttyq. Olar kóp ýaqyt boıy esirtkini ózderi jasap, satýmen aınalysyp kelgen. Tintý kezinde 1,3 keli mefedron tárkilendi. Búgingi tańda toptyń ústinen tergeý júrip jatyr. MadMen toby jastar arasynda tanymal bolǵan. Sony paıdalanyp, esirtki satyp otyrǵan», - dedi Baqytjan Ámirhanov.

Aıta keteıik, buǵan deıin Almatyda «MadMen» tobynyń mýzykanttary esirtki satty degen kúdikpen ustalǵanyn habarlaǵan edik .

Keıinnen «MadMen» tobynyń mýzykanttaryna uıymdasqan qylmystyq top qurdy degen aıyp taǵyldy.