Mádenıet jáne sport mınıstrligi Denıs Ýlanovqa 45 myń dollar tóleıdi
2016 jyly Brazılııada ótken jazǵy Olımpıada oıyndarynda qazaqstandyq aýyr atlet Denıs Ýlanov 85 kelige deıingi salmaq dárejesinde tórtinshi oryndy ıelendi. Oǵan aqshalaı 30 myń dollar syıaqy tólendi.
Alaıda, keıin Olımpıadanyń «qola» júldesin ıelengen G.Sınkraıannyń nátıjesi joıylyp, sportshy shettetildi. Al marapat resmı túrde D.Ýlanovqa ótti. Qazir otandasymyz XXXI Olımpıada oıyndarynyń qola júldegeri.
2021 jyly 9 tamyzda Olımpıadaǵy júldesiniń joǵarylaýyna baılanysty Denıs Ýlanov Mádenıet jáne sport mınıstrliginiń Sport jáne dene shynyqtyrý isteri komıtetine aqshalaı syıaqy mólsherin qaıta qaraý týraly suraý saldy.
Olımpıadada úshinshi oryn úshin 75 myń dollar qarastyrylǵan. Sportshy aıyrmashylyqty alǵysy keldi. Biraq, normatıvtik-quqyqtyq aktiler bolmaǵandyqtan oǵan aqsha aıyrmashylyǵy tólenbegen. Osylaısha. Sport komıteti 2021 jyly 20 tamyzda negizderdiń bolmaýyna baılanysty sportshyǵa syıaqy mólsherin qaıta qaraýdan bas tartty.
Sodan keıin Denıs Ulanov sotqa júgindi. Birinshi satyda sportshynyń talaby qoldaý tapty. Biraq beıindi vedomstvo sheshimge qarsy shaǵym jasady.
Atalǵan isti qaraý bir jyldan astam ýaqytqa sozyldy. Nátıjesinde Joǵarǵy sottyń ákimshilik ister jónindegi sot alqasy syıaqyny qaıta qaraýdan bas tartýdy zańsyz dep tapty.
«Nur-sultan qalasynyń mamandandyrylǵan aýdanaralyq ákimshilik sotynyń 2022 jylǵy 10 naýryzdaǵy sheshimi, Nur-sultan qalasy sotynyń ákimshilik ister jónindegi sot alqasynyń 2022 jylǵy 31 mamyrdaǵy osy is boıynsha qaýlysy kúshinde qalsyn. Qazaqstan Respýblıkasy Mádenıet jáne sport mınıstrliginiń kassatsııalyq shaǵymy qanaǵattandyrýsyz qaldyrylsyn», - delingen qaýlyda.