Mádenıet jáne sport qyzmetkerleriniń jalaqysy kóteriledi

ASTANA. QazAqparat - Elbasynyń keshegi Joldaýy bizdiń salamyzda eńbek etetin barlyq adamnyń múddesin qorǵaıtyndyǵy qýantady. Sebebi bizdiń salamyzda eńbek etip júrgen adamdardy eń aldymen jalaqylarynyń tómendigi alańdatyp kelgen edi. QR Kəsipodaq federatsııasy Mádenıet, sport, týrızm jáne aqparat kásipodaǵynyń tóraıymy Svetlana Imanqulova osyndaı pikir bildirdi, dep habarlaıdy QazAqparat tilshisi.

 "Ózderińiz de bilesizder, elimizdiń kókbaıraǵy shet memleketterde 2 jaǵdaıda ǵana jelbireıdi. Birinshisi - Memleket basshymyzdyń sheteldegi saparlary kezinde. Al ekinshisi mádenııet pen sport salasynyń maıtalmandary júldeli nátıjelerge qol jetkizgende ánuranymyz shyrqalyp, týymyz joǵary kóteriledi. Sondyqtan Qazaq elin shetelge tanytyp júrgen mádenıet jáne sport salasy qyzmetkerleriniń jalaqysy kóteriledi degendi qýana qarsy aldyq", - dedi ol Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyn talqylaýǵa arnalǵan jıynda.

Onyń atap ótýinshe, búginde mádenıet pen sport salasynyń qyzmetkerleri bilim jáne densaýlyq saqtaý salasyndaǵy áriptesterinen de tómen jalaqy alady.

«Mýzeı, muraǵat, kitaphana salasynda jumys isteıtin qyzmetkerlerdiń jalaqysy 25-30 myń teńge shamasynda ǵana. T.Júrgenov atyndaǵy óner akademııasyn bitirip kelgen ártisterimiz fılarmonııaǵa jumysqa kirgende 30-32 myń teńge ǵana jalaqy alady. Al keshe Elbasymyz áleýmettik sala qyzmetkerleriniń eń ózekti máselelerin naqty aıtyp, memlekettik organdarǵa ony sheshý úshin tapsyrma berdi», - dedi Svetlana Imanqulova.

Aıta keteıik, Elbasy Joldaýynda Úkimetke 2019 jyldyń 1 qańtarynan bastap eń tómengi jalaqyny 1,5 ese, ıaǵnı 28 myńnan 42 myńǵa deıin ósirýdi tapsyrǵan bolatyn.

«Bul barlyq sala boıynsha túrli menshik nysandaryndaǵy kásiporyndarda jumys isteıtin 1 mıllıon 300 myń adamnyń eńbekaqysyn tikeleı qamtıdy. Bıýdjettik mekemelerde jumys isteıtin 275 myń qyzmetkerdiń eńbekaqysy kóbeıip, orta eseppen 35 paıyzǵa ósedi. Osy maqsattarǵa 2019-2021 jyldarda respýblıkalyq bıýdjetten jyl saıyn 96 mıllıard teńge bólý kerek»,- degen edi QR Prezıdenti.