Mádenıet týraly zańda kórkem ádebıet týraly taraý joq – Aqberen Elgezek

NUR-SULTAN. QazAqparat – QR Jazýshylar odaǵy tóraǵasynyń orynbasary, aqyn, jazýshy Aqberen Elgezek elimizdegi ádebıettiń damýyndaǵy ózekti máseleler men birqatar usynystaryn aıtty, dep habarlaıdy QazAqparat.

«Birinshiden, qoldanystaǵy «Mádenıet týraly» zańda teatrlar men kitaphana týraly taraýlar bar, tipti kıno salasynda arnaıy zań qabyldadyq. Onyń bári kerek, bári durys. Biraq osy teatr men kınonyń negizinde qandaı dúnıe jatyr? Ol árıne ádebıet. Ádebıet bolmasa, kıno men teatr qoıylymy qaıdan shyqsyn? Kitaphana týraly taraý bar, biraq sol kitaphana sórelerinde ádebı kitaptar turǵan joq pa?», - dedi A. Elgezek elordada QR Mádenıet jáne sport mınıstrliginiń alqa otyrysynda.

Onyń aıtýynsha, zańda kórkem ádebıet týraly naqty taraý joq. Ádebıet týraly janama qaralatyn sózder bar, biraq ol qandaı ádebıet degen naqty uǵymdy anyqtamaıdy.

«Mysaly qoǵamdyq mańyzdy ádebıet týraly taraý bar jáne ol taraýda ol ádebıetti shyǵaryp basý men taratý týraly bulyńǵyr ereje bar. Al naqty kórkem ádebıet týraly taraý joq. Nege biz qazaqtyń kórkem ádebıet degen sózinen qashamyz, sony qalamgerler qaýymy túsinbeıdi. Atalǵan zańda jazýshynyń mártebesi de anyqtalmaǵan. Shyǵarmashylyq qyzmetker degen sóz bar, biraq onyń qoǵamdyq orny men róli naqty aıtylmaǵan. Bizdiń oıymyzsha, aldaǵy ýaqytta atalǵan zańda kórkem ádebıet týraly, jazýshynyń mártebesi men onyń gonorar joldaryn anyqtaıtyn erejeleri bar bólek taraý engizý qajet. Oǵan saıası erik-jiger bar bolsa, osy taraýdy jasaqtaıtyn jumys tobyna qatysyp, kómektesýge daıarmyz», - dedi A. Elgezek.

Buǵan deıin A. Elgezek jańa zaman ádebıeti jasalyp jatqanyn, dáýir suranystary men zaman talaptaryna saı ıkemdelý keregin, ádebıetke jyl saıyn jańa tolqyn jastardyń kelip jatqanyn aıtqan edi.