Mádenıet salasynyń oqý oryndaryn Mádenıet jáne aqparat mınıstrliginiń qaramaǵyna berý kerek - Tuńǵyshbaı Jamanqulov

ASTANA. QazAqparat - Mádenıet salasynyń jas mamandary toı-tomalaq jaǵalap ketti. Bul týraly búgin QR Úkimetiniń selektorlyq rejimdegi otyrysynda Qazaqstan teatr qaıratkerleri odaǵynyń tóraǵasy, Qazaqstannyń Halyq ártisi Tuńǵyshbaı Jamanqulov málim etti.

Qazaqstannyń Halyq ártisi álemdik básekege qabiletti mádenı dildi qalyptastyrý úshin eń birinshi kadr máselesi alǵyshart bolýy kerek ekenin aıta kele, «Elimizde óner salasyndaǵy oqý oryndary stýdentterdi oqytýda qatardan qalyp júrmegenimen, bilim oshaǵyn bitirgen jastardyń, mamandardyń jumysqa ornalasý, sol óńirlerde turaqtap qalýy syndy máselelerimen betpe-bet kelgende qaýqarlyq tanyta almaıdy. Muny biletin jastar Astana men Almatyny aınalsoqtap, olar toı-tomalaq, teledıdar, kınony jaǵalap, bos júredi. Al esesine jergilikti teatrlar maman tapshylyǵyn tartyp, shyǵarmashylyq óner men kásibı qoıylymdar jasaýda álsizdikke boı aldyrady», - dedi.

T. Jamanqulovtyń sózine qaraǵanda, osy oraıda mádenıet salasyna maman daıarlaıtyn joǵary oqý oryndaryn QR Mádenıet jáne aqparat mınıstrliginiń qaramaǵyna ótkizý kerek. Mundaı tájirıbe bizdiń elimizdiń basqa salalarynda bar.