Mádenıet salasynyń 1,5 myń nysanynda qurylys jumystary júredi - Úkimet

NUR-SULTAN. QazAqparat - Jyl saıyn 500 ǵalym álemniń jetekshi ǵylymı ortalyqtarynda taǵylymdamalarmen qamtamasyz etiletin bolady. Bul týraly Májiliste «Nur Otan» partııasynyń saılaý aldyndaǵy mindettemelerin iske asyrýǵa arnalǵan talqylaý kezinde Premer-Mınıstr Asqar Mamın málim etti, dep habarlaıdy QazAqparat tilshisi.

Onyń aıtýynsha, Jol kartasynyń ekinshi baǵytyndaǵy (Zııatker, salamatty jáne yjdaǵatty ult) maqsattardy sheshý úshin 69 is-shara qamtylǵan.

«Mádenıet pen ǵylymdy qoldaý, sondaı-aq eldiń zııatkerlik áleýetin damytý jumystary jalǵasady. Jyl saıyn qazaqstandyq 500 ǵalym álemniń jetekshi ǵylymı ortalyqtarynda taǵylymdamalarmen qamtamasyz etiletin bolady», - dedi A. Mamın.

Onyń sózine qaraǵanda, 2025 jylǵa qaraı mádenıet salasynyń 1500 nysany salynady jáne jóndeýden ótedi. Jyl saıyn 300 nysan qurylyspen jáne jańǵyrtý jumystarymen qamtylady.

Budan buryn habarlanǵandaı, Úkimet «Nur Otan» partııasynyń Parlament Májilisindegi fraktsııasynyń aldynda saılaýaldy baǵdarlamany júzege asyrý boıynsha tıisti Jol kartasynyń jobasyn usyndy.

Jol kartasy Saılaýaldy baǵdarlamasynyń tórt baǵyty boıynsha 362 is-sharadan turady:

- birinshi - «Barshaǵa teń múmkindik»; - ekinshi - «Zııatker, salamatty jáne yjdaǵatty ult; - úshinshi - «Ekonomıka men óńirlerdiń turaqty damýy» jáne tórtinshi - «Halyqqa esep beretin memleket jáne jaýapty azamattar».