Mádenıet mınıstrliginiń burynǵy jaýapty hatshysy men departament basshysy sottaldy

NUR-SULTAN. QazAqparat – Para alǵan QR Mádenıet jáne sport mınıstrliginiń burynǵy jaýapty hatshysy S.Ýálıev, osy mınıstrliktiń Ákimshilik departamentiniń eks-dırektory E.Dárjibaev sottaldy, dep habarlaıdy QazAqparat QR Sybaılas jemqorlyqqa qarsy is-qımyl agenttigine silteme jasap.

Sheneýnikter «QazAqparat» baspa korporatsııasy» JShS prezıdenti Q.Botbaıdan para alǵan. Al para bergen kásipker de jazalandy.

«Sybaılas jemqorlyqqa qarsy qyzmeti QR Mádenıet jáne sport mınıstrliginiń jaýapty hatshysy Q.S.Ýálıevke, mınıstrliktiń Ákimshilik departamentiniń dırektory E.T. Dárjibaevqa, «QazAqparat» baspa korporatsııasy» JShS prezıdenti Q.Q. Botbaıǵa qatysty iri kólemde para alý faktisi boıynsha sotqa deıingi tergeýdi aıaqtady», delingen habarlamada.

Q.Ýálıev jáne E.Dárjibaev ekeýi Q.Botbaıdan dinı taqyrypqa ádebıet basyp shyǵarý boıynsha memlekettik tapsyrys shartyn jasaý arqyly kórsetken jalpy kómegi úshin 37 myń AQSh dollary mólsherinde para aldy degen kúdikke ilingen bolatyn.

30 qazanynda Nur-Sultan qalalyq №2 sotynyń úkimimen S.Ýálıev pen E.Dárjibaevqa 8 jáne 7 jylǵa bas bostandyǵynan aıyrý jazasy taǵaıyndaldy. Sondaı-aq osy úkimmen Q.Botbaı 7 jylǵa bas bostandyǵynan aıyryldy.