Mádenıet mınıstrligi Ulttyq Sýrdlımpıada komıtetin sotqa bermek
Eske sala keteıik, keshe Brazılııada ótip jatqan Sýrdlımpıada oıyndarynda sportshy Erkebulan Qanafın jeńip alǵan altyn medalge qatysty daý týyndaǵan bolatyn.
«Dzıýdoshy Erkebulan Qanafın Sýrdlımpıadadan birinshi altyn medaldi jeńip aldy. Al bizdiń Sport komıteti bul jaıynda habar taratqan da joq. Soraqysy bul emes. Qurama bapkeriniń aıtýynsha, halyqaralyq tóreshiler jeńisti moıyndaǵanyna qaramastan sport komıteti óz quramasynyń medaline narazylyq tanytqan» delingen Qazaqstan Sportshylar odaǵy BAQ ókilderine taratqan málimdemede.
Osyǵan baılanysty Mádenıet jáne sport mınıstrligi jazǵy Sýrdlımpıadaǵa ulttyq qurama komandadan 59 sportshy qatysyp jatqanyn aıtty.
«Alaıda Sýrdlımpıada komıteti Qazaqstan zańnamasyna qaramastan, óz tarapynan birqatar sportshylardy, onyń ishinde Erkebulan Qanafındi jarysqa aparǵan. Qanafın buryn-sońdy estý qabileti buzylǵan sportshylar arasyndaǵy resmı jarystarǵa qatyspaǵan. Qazaqstan Respýblıkasy ulttyq qurama komandasynyń múshesi emes jáne dene múmkindikteri shekteýli jandarǵa arnalǵan sport uıymdarynda tirkelmegen. QR Mádenıet jáne sport mınıstrliginde aýdıogramma nátıjeleri jáne jalpy sportshynyń densaýlyq jaǵdaıy týraly aqparat joq. Osyǵan qaramastan Ulttyq Sýrdlımpıada komıteti E.Qanafındi óz esebinen jarysqa jiberip, Qazaqstannyń bedeline álemdik sport qoǵamdastyǵynyń aldynda nuqsan keltirdi jáne sporttyq etıkalyq qaǵıdalardy buzdy» dep málim etti vedomstvo.
Bul rette Mádenıet jáne sport mınıstrligi ulttyq qurama komandanyń tizimin jasaý kezinde 81 kelige deıingi salmaq dárejesinde sýrdo dzıýdodan Qazaqstan Chempıonatynyń qorytyndysy boıynsha el chempıony Aıdos Túgelbaevty engizgen bolatyn.
Mınıstrlik ulttyq Sýrdlımpıada komıtetiniń ústinen arnaıy sot organdaryna shaǵym túsiretinin resmı túrde málimdedi.