Mádenıet mınıstrligi keıbir sport túrleri boıynsha biryńǵaı standart ázirleýdi josparlap otyr
Bul týraly Mádenıet jáne sport vıtse-mınıstri Sársen Quranbektiń Qazaqstandaǵy DDU eldik keńsesiniń ulttyq úılestirýshisi Laýra Ótemisovamen kezdesýinen málim boldy, dep habarlaıdy QazAqparat mınıstrliktiń Telegram kanalyna silteme jasap.
Kezdesýde taraptar balalar men jasóspirimderdiń densaýlyǵyn jaqsartý baǵytyndaǵy is- sharalardy talqylady. Naqtyraq aıtqanda balalardyń shekten tys semizdigi jáne otyryqshy ómir salty, durys tamaqtaný, jaraqat alý, fızıkalyq belsendilik sııaqty máseleler sóz boldy.
Taraptar óskeleń urpaq arasynda dene shynyqtyrý men sportty nasıhattaý basymdyqqa ıe bolýǵa tıis ekenin, alaıda osy eki uǵymdy ajyratyp, sporttyq daıarlyqtyń ulttyq standartyn engizý qajet ekenin atap ótti.
«Balalar mektepke belgili bir jastan bastap barady, sondyqtan balalardyń fızıologııalyq jáne psıhologııalyq erekshelikterin jáne olardyń fızıkalyq belsendilikke daıyndyǵyn eskeretin keıbir sport túrleri boıynsha biryńǵaı standartty belgileýimiz kerek. Eger bala keıbir sport túrlerimen tym erte aınalysa bastasa, bul onyń fızıkalyq nemese psıhıkalyq densaýlyǵyna zııanyn tıgizýi múmkin. Ásirese, jekpe-jek túrleri týraly aıtatyn bolsaq. DDU sarapshylarymen birge osyndaı standartty ázirlegimiz keledi»,-dedi Mádenıet jáne sport vıtse-mınıstri Sársen Quranbek.
Óz kezeginde Laýra Ótemisova DDU-ny jaraqattaný táýekeli joǵary sport túrleri boıynsha jas shekteýleri máselesinde qazaqstandyq tarapqa keńes berýge daıyn ekendigin málimdedi.
«Bizde fızıkalyq belsendilik máselelerimen aınalysatyn bólim bar. Atap aıtqanda, osyndaı zertteýler júrgizetin Portýgalııadan kelgen sarapshylar jumys isteıdi. Sonymen qatar, bul máselede Qazaqstan úshin basqa elderdiń ozyq tájirıbelerin zerdeleýge jáne taldaýǵa daıynbyz», – dedi DDU-nyń Qazaqstandaǵy keńsesiniń ulttyq úılestirýshisi.