Mádenıet mınıstri Eskendir Hasanǵalıevtiń otbasyna kóńil aıtty
«Qazaq óneri aýyr qazaǵa ushyrady. Taǵy bir darhan júrekti halqymyzdyń dara perzentiniń júregi toqtady. Bar bolmysy elim dep jyrlaıtyn Eskendir aǵamyz kósh-kerýenge ilesip, kelmestiń kemesine minip aramyzdan kete bardy degen sýyt habardy estip, qabyrǵam qaıysyp otyr. QR Mədenıet jəne sport mınıstrliginiń atynan tanymal ənshi, kompozıtor, professor, Memlekettik syılyqtyń laýreaty, «Qurmet», «Otan» ordeniniń, «Platınaly Tarlan» syılyǵynyń ıegeri Eskendir Ótegenuly Hasanǵalıevtiń qaıtys bolýyna baılanysty Hasanǵalıevter əýletiniń qaıǵysyna ortaqtasyp, kóńil aıtamyn», - dep jazdy A. Raıymqulova Facebook paraqshasynda.
Mınıstr E. Hasanǵalıevtiń ǵıbratty ǵumyryn ən men saz əlemine arnap, qazirgi qazaq estradasynyń negizin qalaǵan óner ıesi, otbasy men ortasyna qorǵan bolǵan abzal azamat bolǵanyn jazdy.
«Aǵamyzdyń «Atameken», «Ádemi», «Asyl arman», «Ómirimniń jazy», «Eskirmegen mahabbat» ózge de ánderin bilmeıtin qazaq joq. Shet memleketterde de tyńdarmannyń ystyq yqylasyna bólengen týyndylary bizdiń aramyzda məńgi ómir súredi. Mánerli mýzykasymen ózindik qoltańbasyn qalyptastyrǵan Eskendir Hasanǵalıevtiń shyǵarmashylyǵy qazaq mədenıetiniń qundy qazynasy. Óner maıtalmanynyń asyl beınesi qalyń qazaqtyń kóńil tóri men júrek túkpirinde məńgi saqtalady. Marqumnyń kózi tirisinde jasaǵan ıgi-jaqsy amaldary aldynan jarylqasyn. Jatqan jeri jaıly, topyraǵy torqa bolsyn», - dedi Mádenıet jáne sport mınıstri.
Eskendir Ótegenuly Hasanǵalıev 1940 jyly 13 aqpanda Batys Qazaqstan oblysynda týǵan. 1959 jyly Qurmanǵazy atyndaǵy Almaty memlekettik konservatorııasynyń vokaldy-hor fakýltetin, 1978 jyly Ál-Farabı atyndaǵy Shymkent mádenıet ınstıtýtyn bitirdi. Ómirin ónerge arnaǵan Hasanǵalıevtiń «Atameken», «Ádemi», «Asyl arman», «Ómirimniń jazy», «Eskirmegen mahabbat» ánderin bilmeıtin qazaq joq.
Eskendi Hasanǵalıev – qazaqtyń án ónerine zor úlesin qosqan sazger. Onyń repertýaryndaǵy avtorlyq týyndylary el júreginen oıyp turyp oryn alǵan. Shyǵarmashylyq ǵumyrynda orys, tatar, nemis aqyndarynyń óleńderine de án jazǵan. 200-ge jýyq án, romans jáne horǵa arnalǵan shyǵarmalardyń avtor boldy.
Eskendir Hasanǵalıev pen jubaıy Darıko Hasanǵalıevanyń eki qyzy men bir uly bar.
Buǵan deıin dańqty ánshiniń ómirden ótkenin habarlaǵan edik.