MÁDENIET-2014: jylqy jylyndaǵy jańa esimder
Kınematografııa salasynda
Bıylǵy mádeıet salasyndaǵy oqıǵalar tizbegin ataqty akter, qazaq kınosynyń negizin qalaýshy Sháken Aımanovtyń 100 jyldyǵyna arnalǵan sharalar ashyp berdi. «Qazaqfılm» kınostýdııasy osy ataýly oqıǵaǵa oraı kóptegen sharalar uıymdastyrdy. Kıno sheberiniń fılmderi restavratsııalanyp, sandyq júıege túsirildi. Sh.Aımanov týraly kitaptar, esseler men monografııalar, fotoalbomdar basylyp shyqty. Sonymen qatar, rejısser Bolat Núsipbekov qazaqtyń ardaqty ulynyń ómiri men shyǵarmashylyǵy týraly derekti fılm túsirdi. Qyrkúıek aıynda aty ańyzǵa aınalǵan kınorejısserdiń 100 jyldyq mereıtoıyna arnalyp ótkizilgen H mereıtoılyq "Eýrazııa" Halyqaralyq kınofestıvali aıasynda onyń fılmderi kórsetilip, Sh.Aımanov atyndaǵy Qazaq kınosynyń mýzeıi ashyldy.
Opera ónerinde
Aqpan aıynda Marııa Mýdrıak esimdi jerlesimiz Italııanyń Komo qalasynda ótken bedeldi halyqaralyq AsLiCo konkýrsynda top jardy. Italııanyń «Corriere di Somo» gazeti men basqa da buqaralyq aqparat quraldary qazaqstandyq opera ánshisin atalǵan konkýrstyń "Boıtumary" dep atap, úlken qurmet kórsetti.
Bıyl «Astana Opera» teatrynyń ujymy tuńǵysh ret álemdik týrnege attandy. Elordalyq ártister sapar barysynda álemdik deńgeıdegi Karnegı-holl (Nıý-Iork, AQSh), Sony Centre for the Performing Arts (Toronto, Kanada), Bastılııa operasy (Parıj, Frantsııa), sondaı-aq, Antverpen (Belgııa) jáne Rotterdam (Nıderlandy) sahnalarynda óner kórsetti.
«Astana Opera» teatrynyń ánshisi Saltanat Ahmetova «Úlken opera» jobasynda birinshi oryndy ıelendi. Konkýrstyń fınaly P. Chaıkovskıı atyndaǵy Máskeý konservatorııasynyń Úlken zalynda qarasha aıynda ótken bolatyn. Kórermenderdiń SMS daýys berýi kezinde S. Ahmetov 47% daýys jınady. Reseılik Vasılısa Berjanskaıa ekinshi orynǵa, Belarýstyq Ilıa Sılchýkov úshinshi orynǵa turaqtady.
Jas talanttar
Bıylǵy 30 sáýir men 5 mamyr aralyǵynda Qytaıda ótken "Kóktemgi daýys" halyqaralyq vokal konkýrsynda 13 jasar Aıym Sámekeeva Gran-prı júldesin utyp aldy.
Al on jasar astanalyq Muhammedálı Júginisov Grekııada ótken halyqaralyq «Paradise Holiday-2014» jas talanttar konkýrsynda taǵy da Gran-prı júldesin qanjyǵasyna baılady. Jaz sońynda Artekte M. Júginisov halyqaralyq "Balalar jańa tolqynynda" júldeli úshinshi orynǵa turaqtady.
Sondaı-aq, Máskeýde ótken balalardyń óner forýmy men VI halyqaralyq "Óner ǵalamshary" («Planet of arts») atty festıval-konkýrsy aıasynda Semeı qalalyq №2 mýzyka mektebiniń tárbıelenýshileri Nazerke Tóleýbekova men Rasýl Serikjan oblystyq mamandandyrylǵan balet mektebiniń horeografııalyq ansamblimen birge "Klassıkalyq horeografııa" atalymy boıynsha Gran prı jeńip aldy. Olar sonymen qatar, "Ulttyq bı" nomınatsııasy boıynsha birinshi dárejeli dıplomdy da enshiledi.
Buǵan qosa, 14 jastaǵy Semeı turǵyny Vanessa Bezrodnaıa 11-19 maýsymda Los-Andjeles qalasynda ótken «World championship of performing arts» halyqaralyq óner chempıonatynda pop jáne rok-vokal nomınatsııasy boıynsha jeńimpaz atandy.
Shoý-bıznes
Jylqy jyly qazaqstandyq shoý-bıznes ókilderine de jemisti boldy. Shilde aıynda ótken «Vıtebsk-2014» XXIII halyqaralyq estradalyq án oryndaýshylary konkýrsynda ánshi Marhaba Sábıeva 3-orynǵa turaqtady. Al Janar Duǵalova qarasha aıynda «Turkvizyon-2014» halyqaralyq konkýrsynyń jeńimpazy atandy. Taǵy bir qazaqstandyq ánshi Anatolıı Tsoı TMD elderinde tanymal bolyp turǵan «Hochý k Meladze-2» serıalıtı shoýynda konkýrstyq irikteý qorytyndysy boıynsha « M-Band» tobyna múshelikke qabyldandy.