Mádenı demalys: Nur-Sultanda osy aptada qandaı is-sharalar ótedi

NUR-SULTAN. QazAqparat – Elorda turǵyndary men qonaqtary osy aptada ótetin kontsertter barysynda súıikti ártisteriniń ónerin tamashalaı alady. Sondaı-aq elimizdiń kórnekti qaıratkerleri týraly dáris tyńdap, murajaılardy aralaı alady, dep habarlaıdy QazAqparat Nur-Sultan ákimdiginiń resmı saıtyna silteme jasap.

Memlekettik akademııalyq orys drama teatry osy aptada úsh qoıylym usynady: 29 jáne 30 naýryzda saǵat 19:00-de A.Kasonnyń «Dıkar. Trete slovo»; 2 sáýirde saǵat 11:00-de A.Boldınovtyń «Prıklıýchenııa Aıstenka» ertegisi; sol kúni saǵat 18:00-de A. Ostrovskııdiń «Groza» dramasy.

29 naýryz kúni saǵat 18:00-de E.Rahmadıev atyndaǵy memlekettik akademııalyq fılarmonııa sahnasynda «Álem» estradalyq bı ansambli óner kórsetedi. 31 naýryz kúni saǵat 19:00-de «Astana» kontsert zalynda «V potoke vremenı» ishekti aspaptar kvartetiniń kontserti ótedi. 2 sáýir kúni keshke elordalyq fılarmonııa úrmeli aspaptar orkestri men «Kompıýterlik oıyndardyń saýndtrekteri» kameralyq horynyń mýzykalyq keshin uıymdastyrady.

2 jáne 3 sáýir kúnderi saǵat 16:00-de Astanalyq tsırk jurtshylyqty Almaty memlekettik tsırkiniń «EXCENTRIKO» baǵdarlamasyna shaqyrady.

«Jastar» teatry kórermenderge eki qoıylym ázirlep otyr: 29-31 naýryz aralyǵynda – Q.Júnisovtiń «Prank mahabbat» komedııasyn, 2 jáne 3 sáýirde – І. Esenberlınniń «Ǵashyqtar» dramasyn usynady.

Qýyrshaqtar teatrynda 28-31 naýryz kúnderi «Naýryz-dýman» qýyrshaqtar shoýy ótkiziledi, 1-3 sáýir aralyǵynda G.H. Andersenniń «Kishkentaı sý perisi» ertegisin tamashalaýǵa bolady.

31 naýryz ben 1 sáýirde Mýzykalyq jas kórermen teatry «Tabysty oryn» komedııasyn, al 3 sáýirde «Mahabbat – Júrek» mýzykalyq-poetıkalyq spektaklin kórsetedi.

Nomad City Hall sahnasynda 1 jáne 2 sáýirde Sh.Aıtmatovtyń «Borandy beket» premerasyn usynady.

Nur-Sultan qalasynyń birikken mýzeıler dırektsııasy da osy aptada kóptegen is-shara josparlap otyr. Olardyń basym bóligi kóbirek kórermen jınaý úshin onlaın formatta uıymdastyrylady. 28 naýryzda ALJIR tutqyndaryn eske alýǵa arnalǵan kórme ótedi. 1 sáýirde «Atameken» Qazaqstan Kartasy» etno-memorıaldyq kesheniniń akkaýnttarynda tanymal qazaqstandyq ánshi Roza Baǵlanovanyń 100 jyldyq mereıtoıyna arnalǵan «Tabıǵat syılaǵan daryn» atty dáris ótedi.

1 sáýirde dırektsııa «Sol qandy ýaqytta» kórmesin, al 3 sáýirde «Taǵdyrdy baılanystyratyn jip» ekspozıtsııasyn uıymdastyrady.
30 naýryzda Sáken Seıfýllın mýzeıinde dástúrli túrde onlaın ekskýrsııa, 31 naýryzda «Sáken jáne Rahıma Halfına» atty zertteý-maqala jarııalanady.

Elorda kitaphanalary apta boıy ataýly kúnderge oraılastyrylǵan kitap kórmelerin, oqý saǵattaryn, kezdesýlerdi, ádebıetterge sholýlar men ashyq esik kúnderin ótkizedi. Qala turǵyndary men qonaqtaryn mádenı is-sharalarǵa shaqyramyz.